Shveıtsarııaǵa bizdiń el tájirıbesi qyzǵylyqty - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 21 qarasha, juma kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

Keshe Parlament Senatynyń kezekti jalpy otyrysy bolyp ótti, dep jazady «Egemen Qazaqstan» gazeti « Damýǵa resmı kómek - el áleýetiniń aıǵaǵy» taqyrybymen jarııalanǵan aqparatta. «Ony sóz sóılep ashqan palata Tóraǵasy Qasym-Jomart Toqaev elimizdiń turaqty damýyn kózdeıtin jańa «Nurly jol» Jańa Ekonomıkalyq Saıasatyn jarııalaý aldynda Elbasy jahandyq syn-qaterler men geosaıası jaǵdaıǵa tereń taldaý jasaǵandyǵyna erekshe toqtaldy», - dep jazady basylym.

«Joldaýdyń strategııalyq maqsattaryna qol jetkizý bıliktiń atqarýshy jáne zań shyǵarýshy tarmaqtarynyń negizgi mindeti», - deı kelip, Q.Toqaev osy oraıda Elbasynyń bıýdjet qarajatynyń tıimdi jumsalýyn qatań baqylaýǵa alý qajettigin jáne asa qatal qarjylyq tártip ornatý kerektigin atap kórsetkendigine nazar aýdartty. Bul barlyq memlekettik organdarǵa, onyń ishinde Parlamentke de tikeleı qatysty. «Aldaǵy bizdiń jumysymyz negizinen Elbasy tapsyrmalaryn zańnamalyq turǵydan sapaly qamtamasyz etýmen baılanys­ty bolatyny anyq. Sondyqtan jaýapkershilikti tereń túsinip, osy baǵytta sizderdi birlesip belsendi jumys isteýge shaqyramyn» dep qorytty sózin Senat Tóraǵasy», - delingen maqalada.

***

« Aıqyn » basylymy « EKSPO-ǵa qandaı qundylyqpen baramyz? » degen taqyryppen maqala jarııalap otyr. Onda gazet: «álem kóz tigip otyrǵan kórmede qazaq eli ulttyq qundylyqtaryn, ulttyq salt-dástúrin, ulttyq baı̆ mádenıetin kórsete ala ma?» degen saýalǵa jaýap izdeıdi.

«Mıllıondar Astanaǵa jı­nalatyn, mıllıardtar aqparat quraldary arqyly qadaǵalaıtyn jahandyq jıynda qazaq halqyn jan-jaqty tanytý oılas­ty­rylǵan ba? Ulttyq óner qansha­lyqty deńgeıde dáripteledi? Ulttyq dastarqan qandaı dáre­jede qadirlenedi? Tórtkúl dúnıe toǵysatyn aıtýly kórmede osy­nyń bári mańyzdy. Sáti túsip turǵanda, alys-jaqynǵa qazaq degen ejelgi el ekenimizdi, myń­daǵan jyldyq qalyń tarıhymyz, jerin júdetpegen, elin eńkeıt­pegen ulaǵatymyz bar ekenin pash eteıik. «EKSPO - 2017» kórme­sinde qa­zaq óneri men taǵamynyń ulttyq pa­vılonyn uıymdas­tyraıyq. Onda qazaq qolóneri men dastarqanynyń injý-mar­jan­dary dáriptelsin. Mıl­lıon­daǵan meı­mandar kórmeni aralap júrip te, qonaqúılerde tynyǵyp ja­typ ta saýǵa - qýat, aýrýǵa - em-dári qymyz ben shymyr-shy­myr qaı­naǵan shubatqa shólin qan­dyrsyn. Sary ala qazyǵa tamsa­nyp, bal qaımaq barmaǵyn ja­latsyn», - delinedi maqalada.

« Aıqynnyń » kelesi maqalasy Qazaqstanǵa resmı saparmen alǵash ret Shveıtsarııa Konfederatsııasynyń prezıdenti Dıde Býrkhalter men QR Prezıdenti Nursultan Nazarbaevtyń kezdesýi barysynda talqylanǵan máselelerge arnalǵan.

«Bıik mártebeli meımandy keshe Aqordada Elbasy Nursultan Nazarbaev qabyldady.

Joǵary deńgeıdegi kezdesý barysynda qos memleket basshysy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ózara yntymaqtastyqty nyǵaıtýdyń negizgi máselelerin talqyǵa saldy.

Sondaı-aq prezıdentter naza­ry­nan halyqaralyq kún tárti­binde «kúıip» turǵan, kókeıkesti másele­ler de tys qalmady. Bul tur­ǵyda N.Nazarbaev pen D.Býr­khalter jeke sóılesip, pikir almasty. Osy tusta Shveıtsarııanyń Eý­ro­padaǵy Qaýipsizdik jáne yn­tymaqtastyq uıymynyń qazirgi is basyndaǵy tóraǵasy ekendigin aıta ketken jón. Osyǵan oraı uıym qyzmetiniń sheshýshi qyrla­ry da tilge tıek etildi. Bul uıymǵa qazaq eli basshylyq etken 2010 jyldan beri álemdik jáne aımaq­tyq jaǵ­daı­lar kúrt ózgerip ketti. Bul ret­tegi Qazaqstannyń tájirı­besine qadirmendi qonaq qyzyǵý­shylyq bildirdi», - dep jazylady « Shveıtsarııaǵa bizdiń el tájirıbesi qyzǵylyqty » atty maqalada.

***

«Shymkentte óz balalarynyń ómirin qıǵan Erlan Áljanovtyń isi boıynsha sot úkimi shyqty», - dep habarlaıdy resmı tilde shyǵatyn «Ekspress-K» basylymy.

«Kámeletke tolmaǵan eki ulyn óltirgen qanisher ómir boıyna bas bostandyǵynan aıyryldy. Bul jan túrshigerlik oqıǵa byltyr qyrkúıek aıynda Sozaq aýdanynda oryn alǵan. Polıtsııaǵa denesi pyshaqtan tilim-tilim bolǵan jigit aýrýhanaǵa tústi degen habar túsedi. Odan jaýap alý kezinde ol óz-ózine qol jumsamaq bolǵanyn aıtady. Sonymen qatar er kisi óziniń eki kishkentaı uldaryn óltirgenin jáne keıin úıin de órtep jibergenin aıtty», - delingen « 100 let odınochestva » atty maqalada.