Shveıtsarııa Syrtqy ister mınıstri Qazaqstanǵa resmı saparmen keldi
QR Premer-Mınıstriniń orynbasary – Syrtqy ister mınıstri Murat Nurtileý shveıtsarııalyq delegatsııamen ashyq ári nátıjeli kelissózder ótkizgenin aıtty.
Oǵan qosa, mınıstr Qazaqstan men Shveıtsarııa arasynda ózara syılastyq, barlyq deńgeıde tolyq túsinistik ornatylǵanyna erekshe nazar aýdardy.
«Biz Eýropadaǵy mańyzdy áriptesimiz – Shveıtsarııamen sońǵy jyldary shynymen de aıtarlyqtaı belesterdi eńserdik. Memleket basshysynyń 2021 jylǵy qarashadaǵy Shveıtsarııaǵa sapary úlgili áriptestigimizdi tyń baǵyttarmen tolyqtyrýǵa múmkindik bergeni aıqyn.
Al Shveıtsarııa basshysy 2019 jylǵy qarashada, zań shyǵarýshy organynyń tóraǵasy 2021 jylǵy tamyzda Qazaqstanǵa kelgeni ózderińizge jaqsy málim. Sondyqtan, biz saıası dıalog deńgeıin saqtap, parlamentaralyq yntymaqtastyqty nyǵaıtýdyń, saýda-ekonomıkalyq áriptestik aıasyn keńeıtýdiń jáne mınıstrlikter arasyndaǵy baılanystardy turaqty qoldaýdyń mańyzyn atap óttik», - dedi Murat Nurtileý QR Syrtqy ister mınıstrliginde.
Onyń aıtýynsha, kelissózder barysynda Qazaqstannyń eksport nomenklatýrasyn keńeıtýge, elimizdiń kólik-logıstıka baılanysyn odan ári damytýǵa múddeli ekeni aıtylǵan.
«Ardaqty mınıstr myrzamen mádenı-gýmanıtarlyq, ǵylymı-tehnıkalyq jáne óńiraralyq yntymaqtastyqty damytýǵa, sý dıplomatııasy men sý resýrstaryn basqarý máseleleri boıynsha ózara sharalardy qoldaýǵa kelistik. Sonymen qatar týrızm salasynda jarnamalyq naýqandardy uıymdastyrý arqyly birlesken is-sharalardy júzege asyrýdyń mańyzdylyǵyn atap óttik», - dedi QR Syrtqy ister mınıstri.
Óz kezeginde shveıtsarııalyq dıplomat ótken jyly qos eldiń dıplomatııalyq qarym-qatynas ornatqanyna 30 jyl tolǵanyn, bul aralyqta tyǵyz baılanys qalyptasqanyn atap ótti.
«Búgingi saparym qarym-qatynasymyzdy odan ári nyǵaıtady dep úmittenemin. Menimen birge delegatsııa quramynda Bazel, Bern, Lýgano qalalarynyń ókilderi, parlament músheleri keldi. Keshe Almatyda Shveıtsarııanyń Qurmetti konsýldyǵyn ashtyq, muny da jaqsy belgi dep esepteımiz», - dedi I. Kassıs.