Shvetsııadan asa iri kólemde múlik jymqyrdy degen kúdikti ekstradıtsııalandy

<p>ASTANA. KAZINFORM — Búgin Bas prokýratýra men Qazaqstan Respýblıkasy Іshki ister mınıstrliginiń Interpol qyzmetkerleri Qazaqstan Respýblıkasynyń Stokgolmdegi Elshiliginiń kómegimen bótenniń múlkin asa iri kólemde jymqyrǵany úshin qylmystyq jaýapkershilikke tartý maqsatynda Shvetsııa Koroldiginen Qazaqstan azamatyn ekstradıtsııalady. </p>

Ol 2015–2020 jyly Shymkenttegi saýda ortalyǵynda jumys istep júrip, ózine senip tapsyrylǵan 57 mıllıon teńgege jýyq qarajatty jymqyrdy degen kúdikke ilindi. Qylmys jasaǵannan keıin kúdikti jasyrynyp, oǵan halyqaralyq izdeý jarııalanǵan. Aǵymdaǵy jyldyń aqpan aıynda ol Shvetsııada ustaldy.

— Qazaqstan Respýblıkasy Bas prokýratýrasynyń ótinishi boıynsha kúdikti Qazaqstanǵa ekstradıtsııalanyp, qazir Astana qalasynyń tergeý ızolıatoryna qamaldy. Aıyptalǵan qylmysty jasaǵany úshin múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan 10 jylǵa deıingi merzimge aıyra otyryp nemese onsyz, 7 jyldan 12 jylǵa deıingi merzimge bas bostandyǵynan aıyrý túrindegi jaza qarastyrylǵan, — delingen habarlamada.

Aıta ketý kerek, Shvetsııa Koroldigimen ekstradıtsııalaý týraly kelisimniń joqtyǵyna qaramastan, sottalýshyny ekstradıtsııalaý Qazaqstan Bas prokýratýrasy men Shvetsııa Ádilet mınıstrligi arasyndaǵy tyǵyz yntymaqtastyqtyń arqasynda múmkin boldy.

Odan basqa, ótken jyly shved taraby Qazaqstanǵa izdeýde júrgen 2 adamdy ekstradıtsııalaǵan bolatyn, olar qazir ártúrli jaza túrlerine sottalǵanyn eske salamyz.