Shvetsııa ulttyq qaýipsizdikke qater tóndiretin adamdardy azamattyǵynan aıyrýǵa nıetti

<p>ASTANA. KAZINFORM &ndash; Shvetsııa ulttyq qaýipsizdikke qater tóndiretin qylmys jasaǵan eki nemese odan da kóp azamattyǵy bar adamdardy azamattyqtan aıyrýǵa nıetti. Ol úshin tipti konstıtýtsııaǵa ózgeris engizýdi josparlap otyr, dep habarlaıdy <a href="https://ru.euronews.com/my-europe/2025/01/16/sweden-citizenship-plans" target="_blank" rel="noopener">Euronews.</a></p>

– Bul tyńshylyq nemese memleketke opasyzdyq sııaqty qylmystary úshin sottalǵan adamdardy, sondaı-aq para berý arqyly nemese qıturqy jolmen azamattyq alǵandardy da shved tólqujattarynan aıyrý múmkin degendi bildiredi, – dep habarlady sársenbi kúni el úkimeti.

Bul ózgeristi partııaaralyq komıtet usyndy jáne kelesi jyly Parlamentte daýysqa salynady, ózgerister 2026 jyldyń maýsymynda kúshine enýi múmkin.

Qazirgi ýaqytta Shvetsııa konstıtýtsııasy azamattyqtan aıyrýǵa jol bermeıdi.

Kóshi-qon mınıstri ıÝhan Forssell ótken jyly ulttyq qaýipsizdikke qater tóndiredi dep eseptegen 600-ge jýyq adam Shvetsııa azamattyǵyn alýǵa ótinish bildirgenin málimdedi.

Shvetsııa bir kezderi EO-nyń mıgranttarǵa eń qolaıly elderiniń biri bolyp sanalǵan. Shetelde týyp, Shvetsııa azamattyǵyn alǵandar sany sońǵy jıyrma jylda eki ese ósti. Bul eldiń 10,5 mıllıon halqynyń besten bir bóligin quraıdy.

Úkimet sonymen qatar qos azamattyǵy bar qylmystyq top múshelerin de azamattyǵynan aıyrýdy talap etti, biraq parlamenttik komıtet bul usynysty qabyldamady.

Osy aptanyń basynda úkimet azamattyqqa ótinish berýshiler endi elde bes jyl emes, segiz jyl turýy kerek ekenin málimdedi.

– Biz Shvetsııa azamattyǵy mańyzdyraq bolatyn Shvetsııany qurmaqpyz, – dedi Forsell.

Osyǵan deıin Shvetsııadan asa iri kólemde múlik jymqyrdy degen kúdikti ekstradıtsııalanǵany týraly jazdyq.