Shvetsııa 2 jasqa tolmaǵan balalarǵa telefon bermeýdi usyndy

<p>ASTANA. KAZINFORM — Shvetsııa eki jasqa tolmaǵan kishkentaı balalarǵa uıaly telefon nemese teledıdar ekranyn qaraýǵa tyıym salýǵa keńes beretin jańa ereje shyǵardy. </p>

Sıngapýrdyń 8world resýrsynyń habarlaýynsha, Shvetsııanyń densaýlyq saqtaý mınıstrligi 2 qyrkúıekte densaýlyq saqtaýdyń jańa normasyn iske qosqan. 

Vedomstvo eki jastan bes jasqa deıingi balalardyń uıaly telefon nemese teledıdar ekranyn kórýge jumsaıtyn ýaqytyn kúnine bir saǵattan az ýaqytqa shekteýdi usynady. 

Al 6 men 12 jas aralyǵyndaǵy balalarǵa — eki saǵat, 13 pen 18 jas aralyǵyndaǵy jasóspirimderdiki — úsh saǵattan aspaýy kerek.

Shvetsııa densaýlyq saqtaý mınıstrligi tipti 2 jasqa tolmaǵan balalar mobıldi oıyndar men vıdeolar sııaqty tsıfrlyq medıadan aýlaq bolýy kerek dep málimdedi.

«Tsıfrlyq ónimder men qosymshalar balalarymyzdyń kúndelikti ómirine enip ketkenine tym uzaq boldy», — deıdi Shvetsııanyń densaýlyq saqtaý jáne áleýmettik ister mınıstri ıAkob Forssmed.

Onyń aıtýynsha, Shvetsııada 9 ben 12 jas aralyǵyndaǵy jasóspirimder sabaqtan tys ýaqytta kúnine tórt saǵatqa deıin, al 17 men 18 jas aralyǵyndaǵy jastar jeti saǵattan astam ýaqytyn ekran aldynda ótkizedi.

ıAkob Forssmed bul balalardyń ýaqyty men energııasyn taýysyp, dene men aqylǵa paıdaly áreketterge ketetin ýaqytty aıtarlyqtaı qysqartady dep sanaıdy.

BAQ habarlaýynsha, Shvetsııa úkimeti bastaýysh mektepte smartfonǵa tyıym salýdy qarastyryp jatyr.