Shved arheologteri XII ǵasyrǵa tıesili kúmis monetalardy tapty

<p>STOKGOLЬM. KAZINFORM &ndash; Shvetsııadaǵy arheologtar XII ǵasyr ortalaryna tıesili 170 kúmis monetadan turatyn erekshe olja tapty. Bul týraly ázerbaıjannyń <a href="https://azertag.az/ru/xeber/shvedskimi_arheologami_obnaruzheny_serebryanye_monety_xii_veka-2957209" target="_blank" rel="noopener">AZERTADJ</a> agenttigi jazdy.</p>

Monetalar Vısıngse aralyndaǵy Braha shirkeýindegi qabirlerdiń birinen tabylǵan. Ienchepıng okrýgi murajaıynyń arheologtary Braha shirkeýinde geotermııalyq jylytý ornatýǵa baılanysty jer qazyp, qubyr tósep jatqan sátte eki adamnyń súıegi tabylǵan.

– Biz qabirlerdiń qandaı ekendigin túsiný úshin jerlengenderdiń súıekterin shyǵardyq. Kenetten úsh kúmis moneta kórindi,– deıdi arheolog Anna Oden.

Qabirden kúmis brakteattar dep atalatyn barlyǵy 170 moneta tabylǵan. Sarapshylardyń alǵashqy saraptamasynan keıin olardyń 1150-1180 jyldar aralyǵynda jasalǵany anyqtaldy. Koroldik moneta saraıynyń qyzmetkeri Iva Ionsson muny sensatsııa dep atady.

– Bul Getalandtaǵy erte ortaǵasyrlyq monetalardyń tarıhyn ózgertedi jáne kóp jaǵdaıda belgisiz kezeńderge túsinik beredi, – deıdi ol.

Tabylǵan monetalar arheologtar arasynda úlken qyzyǵýshylyq týdyrdy, óıtkeni qabirdegi mundaı monetalardyń keıbiri buryn-sońdy tabylmaǵan. Ienchepıng okrýginiń murajaıynyń málimeti boıynsha, hrıstıan qabirlerinen zattardy tabý ádetten tys, óıtkeni ádet-ǵuryp alǵashqy qaýymdyq dáýirden bastalady.

Arheologtardyń paıymdaýynsha, monetalar tabylǵan beıit – 20-25 jas aralyǵyndaǵy adamǵa tıesili. Arheologtardy onyń nelikten brakteattarmen birge jerlengeni oılandyryp otyr. Monetalar konservatsııaǵa jiberilmes buryn, olar Ienchepıng okrýginiń murajaıynda kórmege qoıylady.