Shvetsııada surapyl daýyl on myńdaǵan úıdi jaryqsyz qaldyrdy

STOKGOLЬM. QazAqparat - Surapyl «Malık» daýyly búgin Shvetsııanyń ońtústigindegi Skane provıntsııasy men eldiń batys jaǵalaýynda ınfraqurylymǵa zaqym keltirip, ondaǵan myń úıdi elektr jaryǵynsyz qaldyrdy. Bul týraly QazAqparat Shvetsııa radıosyna silteme jasap habarlaıdy.

Daýyl senbi kúni keshke Shvetsııa jaǵalaýyn basyp ótip, artynan shyǵysqa qaraı jyljydy. Keı jerlerde 38,9 m/s-qa jetken qatty jel aǵashtardy qulatty. Birqatar jergilikti elektr kompanııalarynyń málimetinshe, jeksenbi kúni tańerteń shamamen 40 000 úı elektr jaryǵynsyz qalǵan.

Daýyl Stokgolm mańynda ornalasqan eldegi eń iri Arlanda áýejaıynan reısterdiń keshigýine ákeldi.

Batys jaǵalaýdyń kóptegen aýdandarynda, Skane provıntsııasynda jáne Smaland provıntsııasynyń ońtústik-batys bóliginde qaýiptilik deńgeıi áli de joǵary. Gotland aralynda jáne Appland tarıhı provıntsııasynyń jaǵalaýynda da dál osyndaı jaǵdaı qalyptasyp otyr.