Shuǵyl sátterde qatelesýge jol joq – aýyldyq ýchaskelik ınspektor Baǵlan Amanjolov
Baǵlan tań atqannan qyzmetine barýǵa qamdanady. Bul, kúndegi daǵdysyna aınalǵan. Tańǵy asyn ishkennen keıin qyzmet ornyna bet alady. Úıden shyǵar aldynda tátti uıqy qushaǵynda jatqan ulynyń mańdaıynan ıiskeıdi. Al jubaıy búgingi jumysyna sáttilik tilep, shyǵaryp salady.
Eńbekshi aýyly Qarataý qoınaýynda qonystanǵan. Eldegiler tórt túlik ósiredi. Tańǵy qarbalas tirshilik jergilikti halyqtyń kúndelikti ómir aýanyna aınalǵan. Kóshege shyqqan sátte Baǵlan olarmen amandyq-saýlyq surasady. Jas ta bolsa ol aýyldaǵy turǵyndarmen etene jumys jasaýǵa daǵdylanǵan. Úlkenderdiń aqyl-keńesine qulaq asýǵa tyrysady. Bul qoǵamdyq tynyshtyqty saqtaýǵa úlken áserin tıgizedi. Aýyl qarııalary tártip buzǵan tentekterin talqyǵa salyp, tyıyp ustaýǵa kóńil bóledi.
«Men polıtsııa qyzmetiniń qıyndyǵy men qyzyǵy qatar júretinin bala kezimnen bilemin. Bul mamandyqty tańdaǵanyma esh ókingen emespin. Eldiń tynyshtyǵy men amandyǵyn qaltqysyz qorǵaý - bizdiń azamattyq boryshymyz. Mektep qabyrǵasynda júrgende polıtsııa qyzmetkeri bolýdy aldyma maqsat etip qoıdym. Olardyń qyzmetine qyzyǵa qaraıtyn edim. 2011 jyly mektep bitirip, B.Beısenov atyndaǵy Qaraǵandy akademııasynyń tyńdaýshysy bolyp qabyldandym. 2015 jyly quqyq qorǵaý qyzmetinde joǵarǵy bilim alyp shyqtym. Oǵan qosa leıtenant shenin aldym. Kóp uzamaı Shıeli aýdandyq ishki ister bólimine ýchaskelik polıtsııa ınspektory qyzmetine keldim. Maǵan bul salada uzaq jyl eńbek etken aǵa býyn áriptesterim erekshe qoldaý kórsetti. Sol arqyly qyzmetimde mol tájirıbe jınaqtadym», - dedi Baǵlan tilshimen áńgimesinde.
Ol polıtsııa qyzmetkeriniń boıynan qyraǵylyq pen tabandylyq, sypaıylyq, tózimdilik, qarapaıymdylyq, shapshańdyq syndy jaqsy qasıetterdiń barlyǵy tabylý kerek dep sanaıdy. Qandaıda bir jaǵdaıda jedel áreket jasap, tıisti sheshim qabyldaý qajet. Bul sátte qatelesýge eshbir jol joq.
«Ózim qarapaıym otbasynda, aýylda ata-ájeniń, ata-ananyń tárbıesin kórip óstim. Sondyqtan men úshin qazir ózim qyzmet atqaryp júrgen aýyl turǵyndarymen etene aralasý qıynǵa soqqan joq. Olarmen de jaqsy aralasyp turamyn. Burynnan tanys adamdar sekildimiz. Úlken-kishimen tyǵyz baılanystamyn. Baýyrjan Momyshuly «Tártipke bas ıgen qul bolmaıdy, tártipsiz el bolmaıdy» degen danalyqty aıtyp ketken. Bul sózdiń astarynda úlken maǵyna jatyr. Ádette, adamnyń ómirinde qıyndyq pen qýanysh qatar júredi emes pe? Kómek surap kelgen azamatqa barynsha jedel qyzmet kórsetýge kóńil bólemin. Olarǵa qol ushyn berip kómektesip, alǵysyn alyp jatamyz. Bul - biz úshin úlken abyroı», - dedi ol.
Baǵlan 2018 jyly otbasyn qurdy. Byltyr aýdandaǵy Eńbekshi aýyldyq okrýginde memlekettik qoldaý boıynsha jańadan salynǵan ýchaskelik polıtsııa ınspektoryna arnalǵan qyzmettik úı men tirek pýkti paıdalanýǵa berilgen bolatyn. 2019 jyly basshylyq tarapynan Baǵlanǵa sol aýyldyq okrýgte qyzmet atqarýǵa usynys túsken.
«Osylaısha Eńbekshi aýylyndaǵy qyzmettik jolym bastaldy. Jańa úı men ýchaskelik pýnkt bir ǵımaratta ornalasqan eken. Munda jumys isteý úshin barlyq jaǵdaı jasalǵan. 2019 jyldyń qyrkúıek aıynda ulym dúnıege keldi. Osylaısha jańa úı tabaldyryǵyn qýanyshta attadyq», - dedi Baǵlan.
Aýyldyq jerde mal urlyǵy qylmysy bolyp jatady. Qylmystyń aldyn alý – ýchaskelik polıtsııa ınspektorynyń basty mindeti Alaıda eldi mekenderde maldy kezektesip baǵý isine mán berilmeı jatady.
«Jaıylymdyq jerde qaraýsyz júrgen mal urynyń basty nazaryna iligedi. Jeńil oljaǵa dánikken mal urysy kelesi joly sol qylmysty qaıtalap jasaýy ábden múmkin. Osy oraıda jergilikti turǵyndarmen maldy qaraýsyz qaldyrmaý maqsatynda túsinik jumystaryn júrgizemin. Osy oraıda mal ıelerine qatysty GPS qurylǵysyn ornatý, syrǵalaý, tańbalaý jaǵdaıyna nazar aýdaramyn. Bul óz jemisin berip otyr», - dedi Baǵlan óz oıyn bildirip.
Óziniń qyzmettik jolynda jemisti eńbek etip júrgen ýchaskelik polıtsııa qyzmetkeri Baǵlan Amanjolov osylaısha ýaqytpen sanaspaı jumys jasap keledi. Sebebi, tártip saqshysy qoǵamdyq qaýipsizdikti saqtaý jolynda óz isine úlken jaýapkershilikpen qaraıdy.