Shuǵyl qadamdar qamtylǵan rezervtik jospar bar - Áset Erǵalıev
«Koronavırýs pandemııasy qansha ýaqytqa jalǵasaty belgisiz, sondaı-aq bul daǵdarys aıaqtalǵannan keıin ekonomıka qanshalyqty jyldam qalpyna keletinin bilmeımiz. Qandaı da bir jańa teris faktorlar bola ma? Partııa Tóraǵasy jáne Memleket basshysy únemi B plany bolýy kerektigin aıtyp keledi. Qosymsha syn-qaterlerge tap bolsaq, sizderde rezervtik is-qımyl jospary bar ma?», - dep surady Májilis tóraǵasy Nurlan Nyǵmatýlın «Nur Otan» partııasy parlamenttik fraktsııasynyń keńeıtilgen otyrysynda.
Óz kezeginde mınıstr Áset Erǵalıev mundaı jospar bar ekenin jetkizdi.
«Úkimet Ulttyq bankpen jáne Qarjy naryǵyn retteý jáne damytý agenttigimen birlese áleýmettik ekonomıkalyq ahýal nasharlaǵan jaǵdaıǵa birlesken is-qımyl josparyn ázirledi. Ol kotrtsıkldik sıpattaǵy shuǵyl qadamdardy qamtyp otyr. Sondaı-aq halyq pen bıznesti qoldaýǵa, makroekonomıkalyq turaqtylyqty qamtamasyz etýge baǵyttalǵan», - dedi Ulttyq ekonomıka mınıstri.
Budan buryn habarlanǵandaı, QR Premer-Mınıstriniń birinshi orynbasary Álıhan Smaıylov bıýjettiń kiris bóligin ulǵaıtý jumystary qalaı júretinin aıtty.
«Bıyl ekonomıkany qoldaý úshin tıisti sharalar qabyldaý qajettigi týyndaýy múmkin. Sebebi koronavırýsqa baılanysty shekteý qadamdary jalǵasyp keledi. Sonymen birge Úkimettiń aldynda «Nur Otan» partııasynyń saılaýaldy baǵdarlamasyn iske asyrý mindeti tur. Ol úshin qosymsha qarjylandyrý kerek. Aldymyzdaǵy bes jyldyń ishinde baǵdarlamany júzege asyrý úshin 21 trln teńge qajet. Bul turǵyda bıýjettiń kiris bóligin ulǵaıtý jumystary júrgiziledi. Negizinen salyq, kedendik ákimshilendirýdi ary qaraı tsıflandyrý jumystary, sondaı-aq «kóleńkeli» ekonomıkany qysqartý boıynsha arnaıy keshendi jospardy iske asyrý esebinen bolady», - dep túsindirdi Á. Smaıylov.