ShUǴYL: Burynǵy Densaýlyq saqtaý mınıstri J.Dosqalıev bostandyqqa shyqty
«Jaqsylyq Aqmyrzauly zańǵa sáıkes óziniń quqyǵyn paıdalandy. El Prezıdentine raqymshylyq jasaý týraly qoldaýhatpen shyqty. Atalǵan qoldaýhat qanaǵattandyryldy. Aǵymdaǵy jylǵy qańtardyń sońynda jazasyn óteý merzimin 7 jyldan 2 jylǵa qysqartý joly arqyly oǵan raqymshylyq jasaý týraly Prezıdenttiń Jarlyǵy shyqty», - dedi eks-mınıstrdiń úsh qorǵaýshysynyń biri Ardaq Balpyqov Tengrinews.kz tilshisine bergen suhbatynda.
Jaqsylyq Dosqalıevtiń advokatynyń atap ótýinshe, 2012 jylǵy aqpan aıynyń sońyndaǵy jaǵdaı boıynsha ol 1 jyl 4 aı jazasyn ótedi. Zańdy quqyǵyn paıdalanǵan burynǵy Densaýlyq saqtaý mınıstri Astana qalasynyń sotyna shartty túrde merziminen buryn bosatý týraly ótinish jasady.
«Astana qalalyq qylmystyq ister jónindegi mamandandyrylǵan aýdanaralyq sotynyń Jaqsylyq Dosqalıevti shartty túrde merziminen buryn bosatý týraly 29 aqpandaǵy qaýlysy 16 naýryzda kúshine endi. Oǵan eshkim qarsy shaǵym bergen joq, ol zańdy kúshine endi. Búgin, 16 naýryz kúni zańdy negizde Dosqalıev bosatyldy jáne qazirgi ýaqytta ol úıinde týǵan-týystarynyń, dostarynyń ortasynda», - dedi advokat.
A.Balpyqovtyń aıtýynsha, Dosqalıevten «Telemedıtsına» isine qatysty ekinshi epızottaǵy aıyptar alyndy. Buǵan deıin atalǵan is qosymsha tergeýge jiberilgen bolatyn. «Qylmystyq qýǵyndaý organdary Dosqalıevti qylmystyq jaýapkershilikke tartýǵa negiz tappady. Ol jerde «Urlaý» jáne «Laýazymdyq ókilettiligin asyra paıdalaný» syndy jemqorlyqqa qarsy 2 bap bar bolatyn. Bul baptardan qarjy polıtsııasy bas tartty. Sondyqtan da Jaqsylyq Aqmyrzauly bastapqyda aıyp taǵylǵan 5 baptyń bireýi boıynsha ǵana jazasyn ótedi», - dedi ol.
Onyń sózine qaraǵanda, J.Dosqalıev birinshi kezekte densaýlyǵyn qalpyna keltirýge kúsh salmaq. «Onymen áńgimelesý barysynda onyń jan-dúnıesiniń qatty tolqý ústinde ekendigin baıqadym. Raqymshylyq jasaý faktisiniń ózinen zor áser alýda. Sondyqtan da Dosqalıevtiń ózi ony tek qana raqymshylyq retinde ǵana emes, sonymen qatar Memleket basshysy tarapynan berilgen zor senim retinde qaraıdy. Ol mundaı senimdi zor baǵalaıdy», - dedi J.Dosqalıevtiń advokaty.