Shýda jergilikti turǵynnyń úıinen 17 keliden astam marıhýana tuqymy tabyldy
21:30, 20 Qańtar 2021
TARAZ. QazAqparat – Jambyl oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri jedel-izdestirý barysynda Shý aýdanynyń 44 jastaǵy turǵynyn ustady, dep habarlaıdy QazAqparat tilshisi.
Turǵynnyń úıin tintý barysynda jalpy salmaǵy 10 keli 120 gramm «keptirilgen marıhýana», 210 gramm «gashısh», sondaı-aq 17 keli 480 gramm marıhýana tuqymy salynǵan 14 plastıkalyq ydys pen qap tabylyp, tárkilendi.
Atalǵan derekke qatysty QR Qylmystyq kodeksiniń 296-baby 4-bóligi boıynsha sotqa deıingi tergeý amaldary bastalǵan.
Ustalǵan azamat kinásin tolyq moıyndap, Shý aýdanynyń ýaqytsha ustaý ızolıatoryna qamaqqa alyndy.
Jambyl oblysy polıtsııa departamentiniń esirtki qylmysyna qarsy is-qımyl basqarmasynyń bastyǵy, polıtsııa polkovnıgi Asqar Jumabekov tárkilengen 17 keli 480 gramm tuqymnan qylmyskerler 2 gektarǵa deıingi alqapqa marıhýana ósire alatynyn atap kórsetti.