Shýda táýligine 8 myń tonna qyzylsha óńdeıtin qant zaýytynyń qurylysy bastaldy

TARAZ. QazAqparat – Jambyl oblysynyń ákimi Berdibek Saparbaev Shý aýdanyna jumys sapary barysynda «Taraz hımııalyq parki» arnaıy ekonomıkalyq aımaǵyna baryp, qant zaýytynyń qurylysymen tanysty, dep habarlaıdy QazAqparat tilshisi.

Búginde atalǵan ekonomıkalyq aımaqtaǵy eń irgeli jobalardyń biri – qant zaýytynyń qurylysy.

Jobalyq quny 91 mıllıard teńgeni quraıtyn zamanaýı zaýyttyń qýattylyǵy táýligine 8​ myń tonnaǵa deıin qyzylsha óńdeýge jetedi. Qazirgi kezde munda arnaıy qalashyq salynyp, 130 adam vahtalyq ádispen eńbek etýde. Olar tegisteý, irgetastyń ornyn daıyndaý sekildi jumystarǵa qyzý kirisken.

«Taraz hımııalyq parki» arnaıy ekonomıkalyq aımaǵynyń» basqarma tóraǵasy Serik Nurǵojaev jýyq arada jumysshylar sany taǵy da artatynyn aıtty. Al qant zaýytynyń qurylysymen aınalysyp jatqan merdiger búgingi kúnge deıin 800 mıllıon teńge kólemindegi qarjyny ıgerse, jyl sońyna deıin 1 mıllıard 200 mıllıon teńgeni ıgermek. Óz kezeginde oblys ákimi qant zaýytynyń iske qosylýy aýdandaǵy sharýashylyqtardyń jumysyna erekshe serpin beretinin atap ótti. Zaýyt 2023 jyly tolyq qýatynda iske qosylmaq.

Óńir basshysy budan soń respýblıkalyq mándegi «Merki-Shý-Býrylbaıtal» avtojolynyń búgingi jaı-kúıimen tanysty.