Shý turǵynynan 400 myńnan astam doza marıhýana tárkilendi
«Qarasora-2021» jedel-profılaktıkalyq is-sharasy aıasynda Jambyl oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkerleri Shý qalasynyń 20 jastaǵy turǵynyn ustady.
Ol Shý aýdany Tasótkel aýylynan 3 shaqyrym jerde jedel-izdestirý sharalary kezinde qolǵa tústi.
Tintý barysynda odan jalpy salmaǵy 42 keli 500 gramm «marıhýana» esirtki zaty tabyldy.
Tárkilengen esirtkiniń salmaǵy - 400 myńnan astam doza.
«Qazaqstan Respýblıkasy Qylmystyq kodeksiniń 296-baby 4-bóligi boıynsha sotqa deıingi tergeý amaldary bastaldy. Atalǵan qylmys úshin 3 jyldan 7 jylǵa deıingi merzimge bas bostandyǵynan aıyrý túrindegi jaza qarastyrylǵan» - dep atap ótti PD EQQІB bastyǵy polıtsııa polkovnıgi Asqar Jumabekov.
Ustalǵan azamat kinásin tolyq moıyndap, Shý qalasynyń ýaqytsha ustaý ızolıatoryna qamaqqa alyndy.