Shý turǵyndarynyń kóliginen 100 kelige jýyq marıhýana tabyldy

TARAZ. QazAqparat – Jambyldyq polıtseıler Shý qalasynyń turǵyndarynan 96 keliden astam esirtki tárkiledi, dep habarlaıdy QazAqparat tilshisi.

«Qarasora-2021» jáne «Kanal» respýblıkalyq jedel-aldyn alý is-sharalary barysynda Jambyl oblysy Polıtsııa departamentiniń esirtki qylmystarymen kúres basqarmasynyń qyzmetkerleri Shý-Merki avtojolynda «Aýdı» kóligin toqtatty.

«Shý qalasynyń turǵyndary bolyp tabylatyn 35 jastaǵy júrgizýshi men 46 jastaǵy jolaýshyny jáne kólikti tekserý kezinde júk salǵyshtan tórt qap tabylyp, onyń ishinen jalpy salmaǵy 96 keli 900 gramm «keptirilgen marıhýana» esirtki zaty anyqtaldy», - dep habarlady Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.

QR Qylmystyq kodeksiniń 297-babynyń 3-bóligi (Esirtki zattaryn ótkizý maqsatynda asa iri mólsherde zańsyz saqtaý) boıynsha sotqa deıingi tergeý amaldary bastaldy. Atalǵan qylmys úshin múlki tárkilenip, on jyldan on bes jylǵa deıingi merzimge bas bostandyǵynan aıyrý jazasy kózdelgen.

Ustalǵandar kinásin moıyndap, Shý qalasynyń ýaqytsha ustaý ızolıatoryna qamaýǵa alyndy.