Shý qalasynyń turǵynynan 25 keli marıhýana tárkilendi
Jambyl oblysy Polıtsııa departamentiniń Esirtki qylmysyna qarsy is-qımyl basqarmasynyń qyzmetkerleri Shý aýdanynyń Tasótkel aýylynan 15 shaqyrym jerde «Suzuki» markaly mototsıkldi toqtatqan. Kólikti tekserý kezinde onyń jolaýshysy, Shý qalasynyń 57 jastaǵy turǵynynan jalpy salmaǵy 25 keliden asatyn, aq qapshyqqa salynǵan «keptirilgen marıhýana» tabylyp, tárkilendi.
Ustalǵan adam Shý qalasynyń ýaqytsha ustaý ızolıatoryna qamaldy. Osy oqıǵa boıynsha Qylmystyq kodekstiń 296-babynyń 4-bóligimen (Asa iri mólsherde esirtki zattaryn zańsyz saqtaý) sotqa deıingi tergeý amaldary bastaldy.
«Tárkilengen esirtki 10 myń dozaǵa teń keletinin eskersek, onyń jolyn kesý arqyly kóptegen adamdardyń densaýlyǵy men ómiri saqtaldy dep aıtýǵa bolady. Kúdikti atalǵan esirtkini satyp, paıda tappaq bolǵan, óıtkeni qara naryqta keptirilgen marıhýananyń 1 kelisi shamamen 80 myń teńge turady», - dep atap ótti oblystyq PD Esirtki qylmysyna qarsy is-qımyl basqarmasynyń bastyǵy Asqar Jumabekov.