Shý boıynda sýǵa tapshylyq bolmaýy tıis – Meırambek Tólepbergen
Atap aıtqanda, 2019 jyly Qazaqstan Respýblıkasynyń Ekologııa jáne tabıǵı resýrstar mınıstrliginiń Sý resýrstar komıtetiniń tapsyrysymen quny 3,8 mlrd teńge turatyn «Irrıgatsııalyq-drenajdyq júıelerdi jetildirý jobasy (PÝID-2)» baǵdarlamasy osy Shý aýdanynda júzege asa bastaıdy.
Depýtat atap ótkendeı, sýlandyrý aýmaǵy 5 myńnan astam gektar jerdi qamtyp, jalpy uzyndyǵy 94 shaqyrymǵa sozylatyn sý kanalynyń qalpyna keltirý jumysy 2021 jyly aıaqtalady degen ýáde oryndalmaq túgili, 3 jylda ıgerilgeni kózdelgen qarjynyń 13 paıyzyn ǵana (497,6 mln) qurady.
Osy merzimde 12 kanal, 2 kollektrdi qaıta qalpyna keltirýi kerek edi.
– Bul belgilengen jumys bastalmaı jatyp, toqtap qaldy. Endi burynǵy bir sheteldik kompanııa ornyna taǵy bir sheteldik «Týnnel Saýd Arıana» JShS keldi, - dedi M. Tólepbergen.
Osyǵan oraı, Meırambek Tólepbergen aldaǵy ýaqytta elimizdegi sý máselesi Parlament Májilisi depýtattary jumys barysynda erekshe nazar aýdaratynyn atap ótip, problema týǵyzǵan nysannnyń qazirgi jaǵdaıyn bilý úshin Qalyǵul toǵanyna bardy.
Kezdesýde Dýlat aýyldyq qoǵamdyq keńestiń tóraǵasy E. Kirpikbaev bul orasan zor qarjyǵa jasalyp jatqan jumystyń ýádeli merziminde sapaly aıaqtalýyn talap etti.
Óz kezeginde, aýyl ákimi N. Sultanbaev:
– Ýádege ábden toıdyq, menińshe respýblıkalyq Sý komıteti tarapynan qatań qadaǵalaý ǵana emes, ózderiniń de naqty is barysynda suralýǵa tıisti jaýapkershiligi bar, – dedi.
Tehnıkalyq saraptama jasaǵan mekeme mamany D. Kúlshebaev bul nysan kelesi 2023 jyldyń sońyna qaraı aqtalyp,barlyq kanal tolyq qaıta qalpyna keletinin jetkizdi.
Depýtattyń aıtýynsha, ataqty Shý ózeni jaǵalaýy magıstrali mańynda bul nysannyń aýyl sharýashylyǵyn damytý úshin óte qajet.
Jeke sharýa qojalyqtarynyń jankeshti eńbegi de beker ketpeýi úshin de áleýmettik mańyzy zor.
Áleshbaı, Sámbet, Qalyǵul, Ysty, Mátqalyq jáne Podhoz toǵandarynyń qalypty jumys isteýine jergilikti 7 myńnan astam adam tirshilik qamynda qatty nazar aýdaryp otyr.