Shtattyq qurylym áli bekitilgen joq - Abaı oblysynyń ákiminiń suhbaty

NUR-SULTAN. QazAqparat – Jańadan qurylǵan Abaı oblysynyń ákimi Nurlan Uranhaev QazAqparat tilshisine jedel suhbat berdi.

- Nurlan Telmanuly, jańa qurylǵan Abaı oblysynyń basshysy qyzmetindegi jumysyńyz qalaı bastaldy?

- Taǵaıyndalýdan keıin jeksenbi kúni týǵan jerim - Semeıdi aralap, qaladaǵy tozyǵy jetken kóshelerdi karap shyqtym. Endi solardy jóndeýimiz kerek. Kúnde ákimdikte qalanyń ózekti máselelerin talqylap, sheshý joldaryn qarastyrýdamyz. Ýaqyt tyǵyz. Ázirge biz uıymdastyrýshylyq baǵyttaǵy jumystarmen aınalysyp jatyrmyz. Búgingi tańda shtattyq qurylym da bekitilgen joq.

- Taǵaıyndalǵan birneshe kún ishinde óńirdegi qandaı máselelermen tanystyńyz?

- Qalanyń tozyǵy jetken ınjenerlik kommýnıkatsııa júıesin, alańdar men aýlalardy, turǵyn úı qurylysyn qalpyna keltirý, abattandyrý asa ózekti másele. Sonymen qatar Semeı qalasynda jylytý elektr ortalyǵyn salý týraly suraqty da qarastyramyz. Sondaı-aq shaharda beınekameralar ornatý jáne biryńǵaı baqylaý qyzmetin qurý týraly birqatar tapsyrma berdim. Budan ózge óńir Qytaı jáne Reseımen shekaralas bolǵandyqtan, oblystyń tranzıttik áleýetin belsendi túrde paıdalaný jáne sol jerdegi saýdany damytýdy kózdep otyrmyz. Osynyń negizinde shaǵyn jáne orta bıznes túleıdi. Investıtsııa qoldaý,óndiristik jobalarǵa, ken oyrndaryna ınvestıtsııa tartý, óńiraralyq azyq-túlik belbeýin jandandyrý,aýyl-aımaq ınfroqurylymyn qalypqa keltirý, mádenıet aımaǵyn qurý,balamaly energııa kózderin damytý.

- Talap-tilek aıtqan turǵyndardy qabyldap úlgerdińiz be?

- Halyqpen kezdesýler, azamattardy qabyldaý aldaǵy ýaqytqa josparlanǵan. Degenmen birneshe kúnde azamattardyń aýyl sharýashylyǵy, jeńil ónerkásip salasyndaǵy turalap qalǵan jumystardy damytýdy suraǵanyn bilemin. Ony sheshý úshin júıeli jospar quryp, qajetti sharalardy bastaımyz.

- Halyqpen jıi kezdesip, BAQ ókilderine ashyq aqparat berip turýǵa ýáde beresiz be?

- Árıne, múmkindigimizshe aqparatty áleýmettik jelidegi paraqshalarymyzda jáne BAQ ókilderine de habarlaıtyn bolamyz. Ázirge sál ýaqyt berýlerińizdi suraımyn.

- Ýaqyt bólip, suhbat bergenińiz úshin rahmet! Jaýapty qyzmetińizge sáttilik tileımiz!