Shirkeı Túrkistanǵa da jetti
Túrkistan oblysynda birneshe aýyl turǵyndaryn shirkeı ábigerge salyp tur. Ásirese, otyrarlyqtar kúndiz denesin qymtap, betin tormen jaýyp turatyn bas kıim kııýge májbúr.
Qazir shirkeıler oblys ortalyǵy Túrkistan qalasynda da kezdese bastady. Bul týraly Marııam Ábsattar esimdi jýrnalıst áleýmettik jelige «Túrkistanda shirkeı kóbeıip ketipti…» dep jazdy.
Al, Tımýrhan Nazarov esimdi turǵyn «Asylynda shirkeı myna Syrdarııa boıynda, ıakı ózen boılarynda bolýshy edi, qalada júrip bir orynda tura almaısyń» degen pikir qaldyrdy.
Qoǵam belsendisi Ǵanı Nazarbek shirkeı talap jatqanyn jetkizse, Roman Burqash «keshkisin júre almaı qaldyq» degen pikir aıtty.
Qala ákimdiginiń málimetine súıensek, shirkeımen kúres baǵytyndaǵy dárileý jumysyna barlyǵy 6 tehnıka, 10-ǵa jýyq maman jumyldyrylǵan.
Shirkeıge qarsy fıpron, kardınal jáne tıametrın syndy dárileri qoldanylýda.
«Búginge deıin qalanyń negizgi ortalyq kósheleri, ákimshilik-iskerlik, mádenı-rýhanı aýmaǵy men B.Sattarhanov dańǵyly, 9-shy jáne 11-shi kósheler tolyqtaı dárilendi. Shirkeılerge qarsy dárileý jumystary oblys ortalyǵynda úzdiksiz júrgizilýde. Dezınsektsııa jumystary búginde saıabaqtar men kóshe boılarynda jáne shahardyń kógaldy demalys aýmaqtarynda jasalyp jatyr» delingen ákimdik tarapynan berilgen aqparatta.