Shrı-Lankadaǵy prezıdent saılaýynda Anýr Kýmar Dıssanaıake jeńiske jetti

<p>ASTANA. KAZINFORM &ndash; Shrı-Lankada ótken prezıdenttik saılaýda &laquo;Ulttyq halyqtyq bılik&raquo; alıansynyń jetekshisi Anýr Kýmar Dıssanaıake jeńiske jetti, dep jazady <a href="https://belta.by/world/view/na-vyborah-prezidenta-shri-lanki-pobedil-anur-kumar-dissanajake-663097-2024/" target="_blank" rel="noopener">BELTA</a> agenttigi.</p>

«Komıssııa óz veb-saıtynda 55 jastaǵy Dıssanaıake senbi kúngi saılaýda 42,31% daýys jınap, prezıdenttik saılaýda jeńiske jetkenin habarlady. Oppozıtsııa jetekshisi Sadjıt Premadasý ekinshi orynda, al qazirgi prezıdent Ranıl Vıkrmesınghe úshinshi orynda», - dep habarlaıdy basylym.

Saılaý komıssııasynyń qorytyndysy boıynsha, saılaýda daýys bergen 13,6 mıllıon adamnyń 5,6 mıllıonnan astamy Dıssanaıakege daýys berdi. Jańa prezıdenttiń ınaýgýratsııasy 23 qyrkúıekte ótedi.

Dıssanaıakeniń saıası mansaby 1988 jyly Áleýmettik stýdentter qaýymdastyǵynyń ulttyq uıymdastyrýshysy retinde bastalyp, otyz jyldan astam ýaqytqa jalǵasty. Saıasatker «Halyq azattyq maıdany» partııasynyń qatarynda kóterilip, 1995 jyly onyń Ortalyq jumys komıtetine múshe bolyp, 2001 jyly parlament depýtaty boldy. 2004-2005 jyldar aralyǵynda Shrı-Lankanyń Aýyl sharýashylyǵy, mal sharýashylyǵy, jer jáne sýarý mınıstri qyzmetin atqarǵan. 2014 jyly Dıssanaıake «Halyq azattyq maıdany» partııasynyń jetekshisi boldy.

Dıssanaıake buǵan deıin prezıdent bolyp saılansa, azyq-túlik daǵdarysymen kúresý, bilim men densaýlyq saqtaý salalaryna ınvestıtsııa tartý jáne Shrı-Lankanyń ekonomıkalyq ósýine jumys jasaýǵa ýáde bergen bolatyn.