Shpekbaev sybaılas jemqorlyq jıi kezdesetin memorgandardy atady

ASTANA. QazAqparat - 2016 jyly keıbir memlekettik qurylymdarda 500-den astam sybaılas jemqorlyq jaǵdaılary oryn aldy. Bul týraly sybaılas jemqorlyqqa qarsy is-qımyl máseleleri boıynsha azamattyq bastamalar kongresinde QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev málim etti, dep habarlaıdy QazAqparat.

«Eger de tikeleı para alǵan adam jaýapqa tartylǵanymen, alaıda onyń basshysyna jaýapkershilik taǵaıyndalmasa, onda budan tıimdilik óte tómen bolady. Sondyqtan da biz búginde qaramaǵyndaǵy qyzmetkerleriniń sybaılas jemqorlaqqa jol bergeni úshin basshynyń jekeleı jaýapkershiligin arttyrýǵa basymdyq berip otyrmyz. Jyl qorytyndysy boıynsha 500-den astam jemqorlyq áreketter jasalǵan qurylymdar bar ekeni anyqtaldy. Bul degenimiz ne? Bizde bir faktiniń ózi tótenshe oqıǵa bolyp tabylady. Júzdegen faktiler bolǵanymen, eshbir basshy jazaǵa tartylmaǵan»,-dep toqtaldy Shpekbaev.

Onyń sózine qaraǵanda, Aýyl sharýashylyǵy mınıstrliginde, Qarjy mınıstrligi Memlekettik kirister komıtetinde, Іshki ister mınıstrliginde, sondaı-aq ákimdikterde sybaılas jemqorlyq jıi kezdesedi.

Shpekbaevtyń paıymynsha, memlekettik organda sybaılas jemqorlyq júıeli túrde baıqalsa, onda jaýapkershilikke basshy da tartylýy tıis.

Osy oraıda ol jemqorlyqqa qarsy is-qımyl aıasynda aldyn alý sharalarynyń biri memlekettik apparatty qysqartý bolyp tabylatynyn atap ótti. Bunyń esebinen eńbekaqynyń kólemin arttyrǵan durys.

Eger de memqyzmetkerlerdiń 35 paıyzy qysqartylsa, onda ákimshilik shyǵyndardy da únemdeı otyryp, memlekettik qyzmetkerlerdiń eńbekaqysyn eki esege arttyrýǵa múmkindik bolady.