Shotlandııa ýnıversıtetiniń fılıaly Aqtóbede alǵashqy 300 stýdentti qabyldaıdy

AQTÓBE. QazAqparat - Aqtóbedegi Q.Jubanov atyndaǵy ýnıversıtettiń bazasynda sheteldik Heriot-Watt tehnıkalyq ýnıversıtetiniń fılıaly ashylady. Bıyl oǵan grant negizinde 300 stýdent qabyldanady, dep habarlaıdy QazAqparat.

Qazaqstan Respýblıkasy Prezıdentiniń 2022 jyly ekonomıka suranysyna sáıkes joǵary bilim berý júıesin reformalaý jónindegi tapsyrmasyn oryndaý aıasynda Aqtóbe oblysynyń ákimi Eraly Toǵjanov pen Heriot-Watt ýnıversıtetiniń rektory Mark Bıggs arasynda Q.Jubanov atyndaǵy Aqtóbe óńirlik ýnıversıtetiniń bazasynda jetekshi sheteldik ýnıversıtettiń fılıalyn ashý týraly kelisimge qol qoıyldy.

Bıyldyń ózinde alǵashqy 300 stýdent bakalavrıat deńgeıindegi úsh bilim berý baǵdarlamasy boıynsha oqı alady: geoınjenerııa, energetıka, esepteýish tehnıka. Ár mamandyqqa 100 granttyq oryn bólingen. Túlekter Heriot-Watt ýnıversıteti men Q.Jubanov atyndaǵy ýnıversıtettiń qos dıplomyna ıe bolady.

Aqpan aıynda Ulybrıtanııada Qazaqstan Respýblıkasy Ǵylym jáne joǵary bilim mınıstrligi, Heriot-Watt ýnıversıteti jáne Q.Jubanov atyndaǵy ýnıversıtet arasynda yntymaqtastyq týraly úshjaqty memorandýmǵa qol qoıyldy.

Buǵan deıin Ǵylym jáne joǵary bilim mınıstri Saıasat Nurbek 2029 jylǵa qaraı Qazaqstanda 12 sheteldik ýnıversıtettiń fılıaldaryn ashý josparlanyp otyrǵanyn aıtqan bolatyn.