Shoraev elimizdegi jýrnalıstıka fakýltetterin jabýdy usyndy
Mamandardy daıarlaý máselesine qatysty «MedıaAlıans» qoǵamdyq birlestiginiń teń quryltaıshysy Arman Shoraev óz pikirin bildirgen bolatyn. Onyń aıtýynsha, búgingi tańda qazaqstandyq jýrnalıstıka salasy depressııada.
"Kásibı bilikti mamandar joqtyń qasy. QazUÝ-dan basqa ýnıversıtetterde jýrnalıstıka fakýltetterin jabý kerek. Basqalary talaby, daryny joq mamandardy shyǵaryp jatyr. Tek QazUÝ-dan shyqqan sanaýly azamattardy ǵana myqty jýrnalıst dep aıtýǵa bolady, qalǵany muǵalim, oqytýshy bola alady», - dedi Arman Shoraev.
Onyń aıtýynsha, batysta myqty jýrnalıster belgili bir salany oqyp zertteıdi.
Máselen bilikti zańger sol salada jazatyn jýrnalıst bola alady.
«QR Bilim jáne ǵylym mınıstrligi lıtsenzııany ońdy-soldy shashyp jatyr. Ol jerde sybaılas jemqorlyq ta joq emes. Qostanaıda jýrnalıstıkany oqytatyn 15-20 professor bar ma? Jýrnalıstıkany tek praktıka júzinde úırenýge bolady», - dedi ol.
Qatysýshylar, respýblıkalyq ınternet basylym jetekshileri 4 jylda alǵan bilim tez arada eskirip qalatyndyǵyn aıtty.
Halyqaralyq aqparattyq tehnologııalar ınstıtýtynyń kafedra meńgerýshisi Aıgúl Nııazǵulova aıtylǵan synǵa qarsylyq bildirdi.
«Bizdi eshteńe oqytpaıdy degen syn bizge aýyr tıedi. Jýrnalıstıkany oqyǵan mamannyń basqalardan ereksheligi - tehnologııany meńgerip shyǵady. Eger keı adamdarǵa belgili bir JOO-lardyń maman daıarlaýy unamaıtyn bolsa, jalpy otyryp sheshý kerek», - dedi A.Nııazqulova.
QR BǴM ókilderi jumys berýshilerdiń talaby tym joǵary ekendigin aıtty.
«Redaktsııalar bakalavrıattan daıyn maman keledi dep kútedi. Biraq bakalavrıattyń áý-bastaǵy mindeti - úırenýge úıretý. Túlekter praktıkalyq tájirıbemen ǵana mamanǵa aınalady. Naryq pen bilim berý salasynyń arasy alshaqtap ketken. Qazir barlyq salada múmkindik bar. JOO-larda sheberlik saǵattary ótedi. Jýrnalıstıka fakýltetterin eshkim jappaıdy. Ony jańǵyrtý kerek», - dedi QR BǴM keńesshisi Maırash Taıkenova.
QR Aqparat jáne kommýnıkatsııalar vıtse-mınıstri Alan Ájibaev mamandyǵy boıynsha baǵdarlamashy-fızık ekendigin, Ulybrıtanııada mass-medıa kýrsyn támamdaǵanyn aıtyp, jýrnalıst bolý úshin 4 jyl bilim alýdyń qajeti joqtyǵyn atap ótti.
«Kóp jaǵdaıda jańsaq pikir aıtylyp jatady. Medıakeńistik kúnde ózgerip keledi. Máselen, OQO-da 150-den astam gazet-jýrnal shyǵady. Keı jaǵdaıda olardyń tırajy respýblıkalyq basylymdardan asyp ketedi. Biz ortalyq qalalarǵa qarap boı túzemeýimiz kerek, ınternetten góri gazetter áli de suranysqa ıe shaǵyn qalalar da bar. Eń bastysy fakýltetterde ózgerip jatqan medıakeńistiktiń talaptarynan qalyp qoımaı, zaman kóshine ilesip otyrǵan abzal»,- dedi vıtse-mınıstr.
Jıyn barysynda BAQ basshylary, JOO ókilderi, qos mınıstrlik ókilderi jýrnalıst mamandardyń biliktiligin qalaı arttyrý máselesin jan-jaqty talqyǵa saldy.