Shomylýǵa ruqsat etilgen jáne tyıym salynǵan oryndar elektrondy kartada kórsetiledi

NUR-SULTAN. QazAqparat – QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov eldegi shomylý maýsymyna daıyndyq jumystaryn baıandady, dep habarlaıdy QazAqparat tilshisi.

Qazirgi tańda elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajaı belgilengen. Shomylý maýsymy 1 maýsymda resmı bastalady.

«Qazaqstanda 50 myńnan astam sý aıdyny bar, TJM qutqarý bólimsheleri adam kóp jınalatyn sý aıdyndarynyń 125 ýchaskesin baqylaıdy, onda kún saıyn 493 qutqarýshy kúndelikti qyzmet atqarady.Bıyl sý akvatorııalaryn qamtýdy ulǵaıtý jáne azamattardyń qaýipsizdigin qamtamasyz etý úshin qaýipti jáne kúzetilmeıtin sý aıdyndarynda qosymsha 48 kóshpeli qutqarý beketi qoıylady», - dedi Baýyrjan Syzdyqov Ortalyq kommýnıkatsııalar qyzmetinde ótken brıfıngide.

Odan bólek, ákimdikter jáne sý mańyndaǵy demalys oryndarynyń ıeleri birlesip, TJM jedel-qutqarý jasaqtarynda daıarlyqtan ótken 250 qutqarýshyny tarta otyryp, 108 nysandyq qutqarý beketin qurdy. Sýda zardap shekkenderge alǵashqy medıtsınalyq kómek kórsetý úshin óńirlerde 97 medıtsınalyq pýnkt daıyndaldy.

«Qalalyq jaǵajaılarda sýǵa túsýge arnalǵan qaýipsiz balalar jaǵajaıy jabdyqtalatyn oryn ashylady, ol jerde bizdiń qutqarýshylar balalardy júzýge úıretedi.

Sý aıdyndarynda qaıǵyly oqıǵalardyń aldyn alý úshin 2,5 myńnan astam eskertý belgisi ornatylǵan, halyq arasynda 70 myńnan astam úgit-nasıhat taratylǵan. Elimizdiń barlyq óńirlerindegi shomylýǵa tyıym salynǵan jáne ruqsat etilgen oryndardy 2GIS kartografııalyq platformasyna ornalastyrý úshin avıatsııalyq jáne temirjol kóliginiń múmkindikterin paıdalaný máseleleri pysyqtalýda», - deıdi B. Syzdyqov.