Shomylý maýsymy: Alakólde qutqarýshylar táýlik boıy jumys isteıdi

<p>ASTANA. KAZINFORM &ndash; &nbsp; Alakól kóliniń jaǵalaýynda shomylý maýsymy bastaldy, ıaǵnı bul kezeńde Alakól aýdanynyń qutqarý bólimshesiniń ujymyna táýlik boıy jumys isteý júkteledi. Bul týraly Jetisý oblysynyń ákimdigi málim etti.&nbsp;</p>

Qutqarý bólimshesiniń basshysy Marat Smaǵulovtyń aıtýynsha, bólimsheniń jeke quramy 15 adamnan turady. 17 maýsymnan bastap Alakólge oblystyq qutqarý jasaǵynan 4 adamnan turatyn qosymsha kúsh keldi. Súńgýir jabdyqtarynyń 21 jıyntyǵy, jańa qozǵaltqyshtarmen jabdyqtalǵan 7 motorly qaıyq, 2 rezeńke qaıyq, 2 ÝAZ, Nıva, KAMAZ jáne ámbebap «TREKOL» avtomashınalary bar.

«Qazir Aqshı men Kóktuma aýyldarynda uzyndyǵy 15 shaqyrym jaǵajaıda kún saıyn motorly qaıyqtarmen qutqarýshylar patrýldeıdi. 15 maýsymnan bastap Kóktuma aýylynda 3 qutqarýshy men 1 motorly qaıyqtan turatyn jyljymaly beket ornatyldy. Keleshekte munda statsıonarlyq qutqarý bólimshesiniń úlgilik ǵımaratyn salý josparlanýda. Sondaı-aq jumys istep turǵan qutqarý bólimshesiniń bazasynda 4 adamnan turatyn órt sóndirý qyzmeti bólimshesi jumys isteı bastady», - dedi M.Smaǵulov.

Sonymen qatar demalys maýsymy bastalar aldynda qutqarý bólimshesiniń qyzmetkerleri sýǵa shomylýǵa qaýipti jerlerde 16 tyıym salý belgisin, sýdaǵy qaýipsizdik erejeleri týraly 30 belgi ornatyp, kún saıyn demalýshylar arasynda túsindirý jumystaryn júrgizedi, olarǵa jadynamalar taratylady.