Sholpan Karınova orta bilim salasyndaǵy basty problemalardy atady

NUR-SULTAN. QazAqparat – Mektep oqýshylaryna arnalǵan árbir pán boıynsha qaýymdastyq qurylady. Bul týraly QR Bilim jáne ǵylym birinshi vıtse-mınıstri Sholpan Karınova aıtty, dep habarlaıdy QazAqparat tilshisi.

«Búgingi kúngi bilim salasyndaǵy negizgi problemalar - keı muǵalimderdiń óz mamandyǵy boıynsha jumys istemeýi, shaǵyn jınaqty mektepterde muǵalimderdiń jetispeýshiligi jáne olardy ádistemelik kabınetter tarapynan qoldaý jumystarynyń jetkiliksizdigi. Osylardy eskere otyryp, aldaǵy jyly jasalatyn jumystarǵa toqtalaıyn. Birinshiden, muǵalimder men ádiskerlerdiń biliktilik talaptaryn qarastyrý kózdelgen. Ekinshiden, muǵalimderdi joǵary bilim deńgeıinde, kásibı-tehnıkalyq deńgeıinde negizgi oqytý baǵdarlamalaryn qaıta qarastyrý jumystaryna baılanysty barlyq kýrstyq baǵdarlamalar jańartylady», - dedi ol mınıstrliktiń keńeıtilgen alqa otyrysynda.

Sonymen birge Sholpan Karınova muǵalimderdiń attestattaýdan ótý kezindegi ulttyq testileý júıesiniń tapsyrmalaryn retteý de qolǵa alynatyndyǵyn aıtty.

«El Prezıdentiniń tapsyrmasymen muǵalim tapshylyǵy bar jáne bilim salasynda, bilim sapasynda alshaqtyq bar óńirlerge muǵalimderdi, sapaly muǵalimderdi jiberý, onyń ishinde joǵary oqý oryndarynyń úzdik túlekterin jiberý jumystary júrgiziledi. Sonymen birge árbir pán boıynsha pándik qaýymdastyqtar qurylyp, myqty muǵalimderdiń óz tájirıbelerimen bólisý, muǵalimderdiń oqytý ádisterin qoldaý jumystary júrgiziletin bolady. Daryndy balalardy daıyndaıtyn muǵalimdermen jumys jalǵasady», - dedi birinshi vıtse-mınıstr.