Shóberelerimizge de qyzmet etetin jol saldyq – QR Prezıdenti

ASTANA. QazAqparat - Qazaqstanda 2020 jylǵa deıin 17 myń shaqyrym zamanaýı jol salynady. Bul týraly búgin elordadaǵy Táýelsizdik saraıynda ótip jatqan VIII Azamattyq forýmda Elbasy Nursultan Nazarbaev aıtty, dep habarlaıdy QazAqparat tilshisi.

«Bizdiń jer kólemimiz óte úlken, 2,7 mln sharshy shaqyrymdy quraıdy, álemde 9-shy oryndamyz. Osy ulan-ǵaıyr jerde joldyń bári Keńes Odaǵyna qaraı salynǵan. Óńirler bir-birimen joldar arqyly jalǵanǵan joq bolatyn. Men sondyqtan ınfraqurylymdyq baǵdarlama jaıynda aıttym. Sońǵy 5 jylda búkil Qazaqstan boıynsha bizdiń shóberelerimizge de qyzmet etetin 4500 shaqyrym múldem jańa temir-betondy jol saldyq. Taǵy da jalǵastyra beremiz. 2020 jylǵa deıin Qazaqstanda 17 myń shaqyrym zamanaýı avtomobıl joly salynyp, jóndeletin bolady», - dedi Memleket basshysy.

Elbasynyń aıtýynsha, mundaı joldar óńirler arasyndaǵy baılanystardy jyldamdatyp, taýar qunynyń tómendeýine septigin tıgizetin bolady.

«Biz 2500 shaqyrym temir jol saldyq. Esterińizde bolsa, búkil Keńes Odaǵy Baıkal-Amýr magıstralin salamyz dep shýlaǵan bolatyn. Ol kezde odaqtyq úkimettiń múshesi edim. Ol nebári 400 shaqyrym jol ǵana. Búkil Keńes Odaǵy jumyldyryldy. Biz dabyra qylmaı, aıǵaılamaı-aq saldyq. Endi kelesi kezekte oblysishilik, aýdanishilik joldardy qaraý kerek. Eger jol úıińe deıin jetpeıtin bolsa, onda ony jol dep moıyndamaımyz. Biraq, qyzyǵyn kórip júrmiz», - dedi Elbasy.

QR Prezıdenti uzaqtyǵy shamamen 3 myń shaqyrym bolatyn «Batys Eýropa-Batys Qytaı» avtojoly Almaty, Jambyl, Ońtústik Qazaqstan, Aqtóbe oblystarynyń aýmaǵyn basyp ótetindigin aıtty.

«Qashan mundaı jolmen júrip kórip edińizder? Eshqashan júrgen joqsyzdar», - dedi N.Nazarbaev.