Shóberelerim beıbit elde ómir súrip jatqanyna shúkirshilik etemin - Nıkolaı Nesterıýk

ASTANA. QazAqparat - Qazaq jerindegi mándi ómirime shúkirshilik etemin. Bul týraly Alǵys aıtý kúnine arnalǵan Qazaqstan halqy Assambleıasynyń saltanatty sharasynda tilshilerge «Radıma» belarýs mádenı ortalyǵynyń ókili Nıkolaı Nesterıýk málim etti, dep habarlaıdy QazAqparat tilshisi.

Belarýs eliniń týmasy ómiriniń negizgi bóligin Qazaqstan jerinde ótkizgen. Osynda otbasyn quryp, eki qyz jáne bir ul tárbıeledi. Qazirgi kezde tórt shóberesi bar. Bıyl mamyrda aqsaqal óziniń 79 jasqa tolǵanyn atap ótpek.

«1962 jyly Germanııada áskerı boryshymdy ótep bolǵannan keıin, meni birden sol kezde Tselınograd ataýyna ıe bolǵan osy jerge joldamamen jiberdi. Qurylys salasynda kóp jyldar boıy qyzmet ettim. Eńbegime qaraı birqatar marapattarǵa ıe boldym. Jalpy, ózimniń ómir jolyma shúkirshilik etemin, 22 jasymnan bastap ómirimdi osy ólkemen baılanystyrdym. Qazaq jerinde eńbekpen ári beıbitshilikte ómir súrip kelemiz», - dedi N. Nesterıýk.

Sonymen qatar ol qazirgi jastarǵa qatysty pikirin bildirdi.

«Jastardyń jumystan qashatyndyǵy tańǵaldyrady. Ózim 15 jastan bastap kolhozda qara jumys istep, tabysty boldym. Búginde 43 jastaǵy kórshim bar jáne ol jumyssyz otyr. Al onyń ata-anasy zeınetker. Sondyqtan jastardy eńbekke baýlý máselesine erekshe nazar aýdarý kerek dep sanaımyn», - dedi Nıkolaı Nesterıýk.