ShQO jas kásipkerleri forýmynda «Zhas project» jobasy qorytyndylandy
«Zhas project» jas kásipkerler jobasyna oblys boıynsha 14-29 jas aralyǵyndaǵy 491 jas usynys bildirgen. Sonyń ishinen irikteýden ótken 149 joba júzege asyrylǵan. Óz isin bastaýǵa qoldaý bildirgen joba aıasynda jas kásipkerler arnaıy mamandardan jeke kásipkerliktiń qyr-syryn úırenip, isteriń júzege asyrý úshin 1 mln teńge qaıtarymsyz grantqa ıe bolǵan. Olar bul qarajatqa ózderine qajetti qural-jabdyqtar men basqa da qajetti zattaryn satyp alǵan.
Forýmǵa óz jobalarynyń nátıjesimen bólisýge Semeı, Kýrchatov qalalary men Abaı, Aıagóz, Besqaraǵaı, Borodýlıha, Jarma, Úrjar jáne Tarbaǵataı aýdanynyń jas kásipkerleri keldi. Arnaıy kórme uıymdastyrylyp, jastar óz ónimderin tanystyrýǵa múmkindik aldy. Keıbir qatysýshylar qonaqtarǵa tabıǵı sút ónimderin usynsa, endi bireýleri ózderiniń kádesyılyq buıymdarymen kópshilik nazaryn aýdardy.
«Shara maqsaty - jastardy qoǵamdyq ómirge tarta otyryp, bıznes jobalaryn júzege asyrý. Joba aıaqtalǵan soń qatysýshylardyń satyp alǵan qural-jabdyqtary ózderinde qalady. Ary qaraı óz isterin dóńgeletýge múmkindikteri bar. Osy maqsatta «Atameken» Ulttyq kásipkerler palatasy men «Damý» kásipkerlikti damytý qorynyń ókilderi jastarǵa jobalaryn ary qaraı jalǵastyrý tetikteri jóninde keńester berýde»,-dedi «Zhas project» jobasynyń ShQO boıynsha úılestirýshisi Serik Júnisov.