ShQO jaǵajaılarynda 133 tyıym salý belgisi ornatyldy
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha shomylýǵa ruqsat etilmegen 64 ýchaske bar. Onda 133 tyıym salý belgisi ornatylǵan. Alaıda turǵyndar ol jerlerge barýlaryn toqtatar emes.
«Sýdaǵy qaıǵyly oqıǵalardyń negizgi sebebi - tyıym salynǵan jerlerde shomylý. Mundaı sý aıdyndarynyń túbin súńgýirler teksermegen, tereńdigi shamamen 40-60 metrge jetedi, aǵyny da qatty. Qutqarýshylar jaǵalaýdy únemi patrýldep, halyqqa túsindirý jumystaryn júrgizýde», - dedi ShQO TJD bastyǵynyń orynbasary Dmıtrıı Tıtov.
Onyń aıtýynsha, sýdaǵy qaýipsizdik erejelerin saqtamaý jáne tyıym salynǵan jerlerde shomylý qaıǵyly oqıǵalarǵa ákep soǵýy múmkin. Ótken shomylý maýsymynda osyndaı qaýipti sý aıdyndarynda 31 adam, onyń ishinde 8 bala qaza bolǵan.