ShQO ustazy: Abaıdyń týǵan kúnine baılanysty birizdilikke tústik
«Abaı barsha qazaqty qarańǵy túnde jol silter temirqazyq ispetti bilimge, ǵylymǵa shaqyryp, jaman qasıetterden ada bolýǵa úndegen kemeńger tulǵa. Mine dál osy jaıly Prezıdentimiz Qasym-Jomart Toqaev «Abaı – rýhanı reformator» atty maqalasynda ashyp aıtty. Birinshiden, 10 tamyz resmı túrde Abaı kúni bolyp bekitilgeni áste durys boldy. Sebebi eldiń basym bóliginde hakimniń mereıtoıy osy kúnde ótkizilse, Semeıdegi zııaly qaýym 23 tamyzda atap ótip júrgen. Bıyldan bastap bul da birizdilikke tústi. Abaı kúniniń mán-maǵynasy zor. Osy kúndi halyq Memleket basshysy aıtqandaı «toı toılap emes, oı oılap ótkizý kerek». Eger biz aıtys uıymdastyryp, as berip, at jarystyrýmen ǵana shektelsek, bul merekeniń basqadan qandaı aıyrmashylyǵy bolmaq?! Abaı kúninde hakimniń ǵana emes, ol jaıly jazylǵan jańa óleńderdi, áńgimelerdi, shyǵarylǵan ánder men kúılerdi dúıim jurtqa usyný qajet dep esepteımin», - deıdi ol.
Qasym-Jomart Toqaev óz maqalasynda mereıtoılyq birqatar is-shara onlaın formatqa aýystyrylǵanyn jetkizdi. Tólegen Janǵalıev bul sheshimniń koronavırýs ınfektsııasynyń taralý qaýpine baılanysty durystyǵyna shúbá keltirmeıdi.
«Prezıdentimizdiń ózi Abaıdyń óleńderin jatqa aıtyp, chellendj bastap, ony búkil álem qoldaǵany belgili. Negizinen osyndaı sharalardyń barlyǵy keleshek urpaq úshin júrgizilip jatyr deýge bolady. Sebebi Abaıdy oqý, tanyp-bilý arqyly sanaly urpaq qalyptasatyny sózsiz. Uly aqynnyń 175 jyldyǵy aıasynda hakimniń týǵan jeri abattandyrylyp, Qaraýylda mektep salyndy. Budan bólek te atqarylyp jatqan ıgi jumystar az emes», - deıdi ustaz.