ShQO turǵynynan 25 keli marıhýana tárkilendi
03:00, 02 Aqpan 2021
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri Kúrshim aýdanynyń turǵynynan 25 keli marıhýana tárkiledi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, krımınaldyq polıtsııa basqarmasynyń qyzmetkerleri Kúrshim aýdanyndaǵy sharýa qojalyqtarynyń biriniń aýmaǵynan ótkir ıisi bar ósimdik tektes zat salynǵan úsh qapty tapty.
«Jedel-izdestirý sharalarynyń nátıjesinde bul esirtkini byltyr jaz kezinde qojalyqta jumys isteıtin 28 jastaǵy er adamnyń daıyndaǵany anyqtaldy. Saraptamanyń qorytyndysy boıynsha tárkilengen zattyń marıhýana ekendigi belgili boldy. Onyń jalpy salmaǵy – 24 866 gramm», - dedi ShQO PD bastyǵy Saǵat Mádıev.
Qazirgi ýaqytta tártip saqshylary QR Qylmystyq Kodeksiniń 296-baby boıynsha sotqa deıingi tergeý amaldary júrgizýde.