ShQO turǵyndary jedel kómekke kelgen polıtseılerge rızashylyǵyn bildirdi

ÓSKEMEN. QazAqparat – 1 naýryz – Alǵys aıtý kúninde Shyǵys Qazaqstan oblysynyń turǵyndary der kezinde kómekke kelip, nátıjeli áreket ete bilgen polıtsııa qyzmetkerlerine óz rızashylyqtaryn jetkizdi, dep habarlaıdy QazAqparat tilshisi.

Tonaýshy qolǵa tústi

Marııa Lomakına Semeı qalasyndaǵy Shyǵys kentinde turady. 26 qańtar kúni túnde onyń jer úıine ury túsken. Bul kezde úıde eshkim bolmady. Aram pıǵylyn iske asyrmaq bolǵan adam qulypty buzyp ishke kirgen.

Bólmelerdi túgel tintigen ol avtokólik bólshekterin urlap ketti. Naqty aıtqanda, berilis qoraby, qozǵaltqysh blogy jáne «Element-5» markaly avtomagnıtola qoldy boldy.

«Tańerteń saǵat 10.00 shamasynda úıge keldim. Basynda óz kózime ózim senbedim. Úı ishi astań-kesteń. Birer sátten keıin ǵana esimdi jıyp, «102-ge» qońyraý shaldym. Polıtsııa qyzmetkerleri kóp uzamaı kelip jetti», - dep eske aldy úı ıesi.

Jedel-izdestirý sharalaryn júrgizgen polıtsııa qyzmetkerleri urynyń kim ekenin anyqtady. Sodan soń 27 jastaǵy kúdiktini qolǵa túsirdi. Tergeý kezinde er adam óz kinásin moıyndady. Al urlanǵan zattar jábirlenýshige qaıtaryldy. Aqpan aıynyń ortasynda is sotqa joldanǵan.

«Uryny quryqtap, múlkimdi qaıtaryp bergen saqshylarǵa myń alǵys! Osyndaı jumysyna adal azamattar barda qaýipsizdigimiz úshin alańdamaımyz. Denderińizge saýlyq, jumystaryńyzǵa tabys tileımin», - dedi M.Lomakına.

1 saǵattyń ishinde ustady

Gúlmıra Ahmetova Ulan aýdany Qasym Qaısenov kentinde ornalasqan dúkende satýshy bolyp jumys isteıdi. Birde dúkenge kelgen beıtanys áıel kerekti zattaryn tańdap alǵan soń, tóleıtin aqshasy joq ekendigin aıtqan.

«Aqsha tóleýińiz kerek» desem tyńdar emes. «Onda qaryzǵa berińiz» deıdi. Olaı bolmaıtyndyǵyn aıttym. Sonda da biraz daýlasty. Aqyry kelispeıtinimdi túsinip, kóngendeı syńaı tanytqan. Sóıtsem, keterde biraz taýardy ózimen ala shyǵypty», - deıdi satýshy.

Uryǵa jem bolǵanyn túsingen soń lezde polıtseılerden kómek suraǵan. Shuǵyl kelip jetken joǵary leıtenant Saıat Sultanov dúken ishindegi beınebaqylaý kamerasynyń jazbasyn qarap shyǵyp, álgi áıeldiń kim ekenin anyqtaǵan.

Sóıtip, 1 saǵat ishinde kúdikti qolǵa tústi. Quqyq qorǵaý organynyń qyzmetkerleri oǵan qatysty qylmystyq is qozǵaǵan.

«Qysqa ýaqyt ishinde uryny ustaǵan saqshylarǵa rıza boldym. Qandaı da bir qıyndyqqa tap bolǵan azamattarǵa qol ushyn sozýǵa daıyn turatyn sizderge óz rızashylyǵymdy bildirgim keledi. Osylaı halyqtyń alǵysyna bólenip júre berińizder!», - deıdi G. Ahmetova.