ShQO turǵyndary demalys kúnderi taýly jerlerge barmaǵany durys - TJD
05:28, 18 Aqpan 2023
ÓSKEMEN. QazAqparat – Shyǵys Qazaqstan oblysynyń taýly jerlerinde 20 aqpanǵa deıin qar kóshkini júrýi múmkin, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 17-20 aqpan aralyǵynda óńirdiń taýly jerlerinde qar kóshkini júrý qaýpi bar.
«Meteorologııalyq jaǵdaıdyń ózgerýine, qardyń tolastamaı jaýýyna jáne jeldiń kúsheıýine baılanysty oblystyń taýly jerlerinde qar kóshkini túsýi yqtımal. Osy rette, turǵyndarǵa barynsha abaı bolýdy, eshbir jaǵdaıda taýǵa shyqpaýdy eskertemiz. Eger qandaı da bir qıyndyqqa tap bolsańyzdar birden «112» nómirine qońyraý shalyńyzdar», - dep habarlady vedomstvo ókilderi.
Sondaı-aq qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.