ShQO turǵyndary bıyl HQO-dan 1,5 mln qyzmet aldy

ÓSKEMEN. QazAqparat – Shyǵys Qazaqstan oblysynyń turǵyndary jyl basynan beri halyqqa qyzmet kórsetý ortalyqtarynda 1,5 mln-nan astam qyzmet aldy, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy ShQOF dırektory Azamat Esembýlovtyń aıtýynsha, reestrdegi 690 memlekettik qyzmettiń 662-i korporatsııasy arqyly kórsetilgen.

Onyń 645-i elektrondy formatta qoljetimdi.

«Jyl basynan beri óńir jurtshylyǵyna HQO-lar arqyly 1,5 mln-nan astam memlekettik qyzmet kórsetildi. Bul ótken jyldyń sáıkes kezeńimen salystyrǵanda 15%-ǵa artyq. 2021 jyly elektrondy qyzmetterdi óz betinshe alý kórsetkishi de ósken. Máselen, byltyr turǵyndar ózderi 900 myńnan astam qyzmetti ózderi alsa, bıyl bul kórsetkish 1 mln-ǵa jetti. Bul jerde koronavırýs pandemııasynyń áseri bar», - dedi ol onlaın formatta ótken baspasóz konferentsııasynda.

Sondaı-aq avtokólik ıeleri qyzmetterdi jıi onlaın ala bastaǵan.

Osy jyldyń basynan beri mamandandyrylǵan HQO-da shyǵysqazaqstandyqtar óz betinshe 26 myńnan astam memlekettik qyzmet alǵan.

Onyń ishinde 10 myńǵa jýyq azamat avtokólikti qaıta tirkeýden ótkizse, 3 myńnan astamy júrgizýshi kýáligin onlaın ótinish berý arqyly aýystyrdy.