ShQO turǵyndarynyń peshtegi tamaqty umyt qaldyrýy saldarynan 90-nan astam órt bolǵan

<p>Shyǵys Qazaqstan oblysy turǵyndarynyń peshtegi tamaqty umyt qaldyrýy saldarynan jyl basynan beri 94 ret órt shyqty, dep habarlaıdy <a href="Kazinform" target="_blank" rel="noopener">Kazinform</a>.</p>

ShQO Tótenshe jaǵdaılar departamenti baspasóz qyzmetiniń málimetine súıensek, úılerde órt shyǵýyna jıi sebep bolatyn jaǵdaılardyń biri – peshtegi tamaqty umyt qaldyrý. 2023 jyldyń basynan beri óńir qutqarýshylary osyndaı sebepten bolǵan órtti aýyzdyqtaýǵa 94 ret attandy.

«Mundaı oqıǵalar negizinen adamdardyń umytshaqtyǵynan bolyp jatady. Kastróldi nemese tabany peshke qoıyp, ony páterdi kók tútin basqan kezde ǵana esine túsiredi. Umytshaqtar arasynda - úı sharýasyndaǵy áıelder, qart kisiler, úıge túngi aýysymnan keletinder jáne mas kúıdegi adamdar bar. Keıde kórshilerdiń shaqyrýyna kelgen órt sóndirýshiler úı ıelerin múldem tappaıdy», - deıdi oblystyq TJD bastyǵynyń orynbasary Serik Amangeldın.

Peshte tamaqty umyt qaldyrý óte qaýipti. Balalar, qarttar, tynys alýy aýrýlary bar adamdar tútinnen zardap shegedi. Tamaqty peshke qoıyp uıyqtap jatqan azamat eshqashan oıanbaı qalýy múmkin.

«Tamaq kúıgen kezde áýeli tútin paıda bolady. Joǵary temperatýradan janǵysh materıaldar janyp ketýi múmkin. Mysaly, jaqyn jerde turǵan shkaf, ilýli perde. Plastmassadan jasalǵan buıymdar jyldam erı bastaıdy. Al plastmassa ýly zattardy shyǵarady. Peshke tamaq qoıyp umyt qaldyrǵany saldarynan órt shyqsa QR ÁQBtK-niń 410-baby boıynsha eskertý jasalyp nemese jeke tulǵalarǵa 5 AEK mólsherinde aıyppul salynady», - delingen aqparatta.