ShQO turǵyndaryna qansha tonna kómir qajet jáne baǵasy qansha
Óńir boıynsha halyqqa jáne jylý kózderi úshin kómir jetkizý «Qarajyra» AQ jáne «QTJ UK» AQ-men birlesip bekitilgen keste boıynsha júzege asyrylady. Bul týraly Kazinform tilshisiniń suraqtaryna jaýap bergen Shyǵys Qazaqstan oblysy Energetıka jáne turǵyn úı-kommýnaldyq sharýashylyq basqarmasynyń basshysy Nurlan Ramazanov málim etti.
«Oblysta halyq pen zańdy tulǵalar úshin kómirdi 22 óńirlik operator satady. Baılanys derekteri men otyn satý oryndarynyń mekenjaılary kórsetilgen óńirlik operatorlardyń tizbesi basqarmanyń resmı saıtynda jarııalanǵan. Shyǵys Qazaqstan oblysy turǵyndary úshin kómirge qajettilik – 440 069 tonna, bıýdjettik uıymdar úshin – 39,5 myń tonna. Búgingi tańda halyq úshin 216,4 myń tonna, bıýdjettik uıymdar úshin 37,3 myń tonna kómir jetkizildi», - deıdi basqarma basshysy.
Qyrkúıek aıynyń basyndaǵy jaǵdaı boıynsha oblys tuıyqtarynda 15,9 myń tonna kómir bar. Onyń ishinde:
- Óskemen qalasynda - 7 609 tonna
- Rıdder qalasynda - 205 tonna
- Altaı aýdanynda - 2 240 tonna
- Glýbokoe aýdanynda - 3 300 tonna
- Shemonaıha aýdanynda - 2 487 tonna.
Kómirdiń baǵasy – orta eseppen 15 800-22 000 teńge aralyǵynda.
Aımaqtaǵy jylý jelilerin jóndeý jumystary aıaqtalýǵa jaqyn. Búgingi kúni josparlanǵan 67,3 shaqyrymnyń 55,6 shaqyrymy jóndeldi. Bul degenimiz – 84%. Kómirdiń baǵasyn, alyp jatqan halyqtyń az-kóptigin bilý úshin Óskemenniń sol jaǵalaý shaǵyn aýdanynda ornalasqan kómir satatyn tuıyqqa baryp kórdik. «Toplıvnaıa kompanııa termınal» JShS dırektory Mansur Bekbaýovtyń aıtýynsha, qara otyn alýǵa kelip jatqandar sany onsha kóp emes.
«Bizge kómir 10 vagonmen kúndelikti jetkizilip jatyr. Biraq halyq azdaý. Tańerteń 30-40 adam kelse, tústen keıin keletinder saýsaqpen sanarlyqtaı. Kómirdiń bir tonnasynyń baǵasy – 15 800 teńge. Byltyrǵymen salystyrǵanda 600 teńgege qymbattady. Bul tasymaldaýǵa ketetin shyǵynnyń artýyna baılanysty bolyp otyr. Áleýmettik kómirdiń baǵasy tonnasyna – 15 300 teńge», - deıdi ol.
Bul tuıyqtaǵy qoımada 3 myń tonna kómir bar. Jylda qyrkúıek aıynyń aıaǵy men qazan aıynda kómirge degen suranys kúrt ósip, uzyn-sonar kezek qalyptasady.
«Kómirdi Abaı oblysyndaǵy Qarajyra kómir ken ornynan satyp alamyz. Degeleń stantsııasy arqyly Semeıdi basyp ótip osynda jetkiziledi. Jurtshylyqty kómirdi erterek satyp alýǵa shaqyramyn. Sebebi kún sýytyp, qar jaýyp ketse kómirge sý tıedi», - deıdi Mansur Bekbaýov.
Qys boıy kómir jaǵyp shyǵatyn aýyl turǵyndarymen baılanysyp kórdik.
«Jer úıde turamyz. Jyl saıyn qarasha aıynyń aıaǵynda 5 tonna kómir satyp alamyz. Qarajyranyń kómirin aýylǵa KamAZ-ben alyp keledi. Bir tonnasy – 30 000 teńge. Jetpeı qalady. Birden jetetindeı qylyp alaıyq desek qaltaǵa salmaq túsip ketedi», - deıdi Tarbaǵataı aýdany Saryóleń aýylynyń turǵyny Nurbol Samatov.
Ulan aýdany Іzǵutty Aıtyqov aýylynda turatyn Erbolat Hamza kómirdi jyl saıyn qarasha aıynyń ortasynda satyp alatynyn jetkizdi.
«Kómirdiń baǵasy tonnasyna – 14000-18000 teńge aralyǵynda. 14000 teńge turatyn kómirdiń sapasy nasharlaý. Sol úshin qymbatyn alamyz. Jylytý maýsymy aıaqtalǵanǵa deıin 8 tonna kómir jaǵamyz. Kómirdi Óskemennen satyp alyp, ózimiz jetkizemiz. Al aýylǵa tasıtyndarǵa 5 tonna kómir úshin 20 myń teńge tóleýge týra keledi. Al 5 tonnadan kóp alsań jetkizip berýshilerge 30 myń teńge tóleısiń», - deıdi ol.