SQO-da kún jylynǵaly kene shaqqan 350 adam dárigerge qaraldy

<p>PETROPAVL. KAZINFORM &ndash; Soltústik Qazaqstan oblysynda 1 sáýirden bastap 350 adamdy kene shaqty. Desek te, bul ótken jyldyń uqsas kezeńimen salystyrǵanda 1,3 esege tómen.</p>

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, byltyr sáýir-maýsym aralyǵynda 454 adamdy kene shaqqan. Bıyl qansorǵyshtan zardap shekkenderdiń 29%, ıaǵnı 103-i – 14 jasqa deıingi bala.

«Kene shaǵýdyń epıdemııalyq maýsymy qazan aıyna deıin jalǵasady. Bıyl kene entsefalıti jáne Laım borrelıozy tirkelmedi. Jalpy kene - kene entsefalıti, kene súzegi, kene borrelıozy nemese Laım aýrýy, gemorragııalyq qyzba jáne t.b. sııaqty kóptegen juqpaly aýrýlardyń qozdyrǵyshy retinde qaýipti», - deıdi Arman Kúshbasov.

Kene entsefalıtiniń vırýsy adamǵa negizinen ıksod keneler arqyly beriledi. Keneni ezgende nemese shaqqan jerdi tyrnaǵanda vırýs teri arqyly juǵýy múmkin.

«Kene shaqqan jaǵdaıda ony kúshpen julyp alýǵa tyryspańyz. Basy denede qalyp qoıyp, qatty qabyný reaktsııasyn týdyrýy múmkin. Kene shaǵyp turǵan jerge etıl spırtin nemese odekolon tamyzyp, keıin jándiktiń basy qalyp qoımatyndaı lasso-qalamymen, pıntsetpen nemese qarapaıym jippen tartyp alyńyz. Keneni plastık ydysqa nemese bótelkege salyp, eki kún ishinde ony zerthanaǵa aparý kerek. Jarany ıodpen nemese spırtpen óndeńiz», - deıdi dáriger.

Mamannyń aıtýynsha, keneni alý úshin maıdy, maıly kremdi qoldanýǵa bolmaıdy. Bul jaǵdaıda ol demala almaı, silekeı men qozdyrǵyshtardy reflektorly túrde qanǵa jiberedi, osylaısha ınfektsııa juǵý qaýpin arttyrady.

Buǵan deıin SQO «Jezqazǵan-Petropavl» avtojolynda kólik júrgizýshisi abaısyzda jolǵa shyǵyp ketken qoılardy qaǵyp ketkenin jazǵan edik.