ShQO sharýa qojalyqtarynda jyl basynan beri 70-ten astam órt boldy
ShQO tótenshe jaǵdaılar departamenti baspasóz qyzmetiniń málimetine súıensek, óńirdegi sharýa qojalyqtaryndaǵy ǵımarattar óte tez janyp ketedi. Órt jaqyn mańdaǵy úıler men qora-jaılarǵa taralýy múmkin.
Osy jyldyń basynan beri Shyǵys Qazaqstandaǵy sharýa qojalyqtarynda 70-ten astam órt shyqty. Munyń sebebi kóbinese otpen abaısyz jumys isteý, peshti jylytý jáne elektr jabdyqtaryn paıdalaný kezinde órt qaýipsizdigi erejelerin saqtamaýdan boldy.
«Jylytý maýsymy bastalǵaly TJD qyzmetkerleri 197 000-nan astam turǵyn úıdi aralap shyqty. Sharýa qojalyq ıelerimen kezdesti. Sol kezde qaýipsizdik erejeleri jiti túsindirildi. Órttiń aldyn alýǵa kómektesetin erejeler jazylǵan jadynamalar taratyldy», - deıdi departament bastyǵynyń orynbasary Serik Amangeldın.
Onyń aıtýynsha, otpen jumys istegende barynsha abaı bolý qajet.
«Úı-jaılarda temeki shekpeńiz. Elektr qurylǵylaryn ony daıyndaǵan zaýyttyń nusqaýyna sáıkes qoldanyńyz. Elektr jelisin shamadan tys júktemeńiz, bir rozetkaǵa birneshe qýatty elektr qurylǵylaryn qospańyz», - dep túsindirdi S. Amangeldın.