ShQO saılanǵan 131 ákimniń tek ekeýiniń ǵana joǵary bilimi joq
Bul týraly óńirlik kommýnıkatsııalar qyzmetindegi brıfıngte Shyǵys Qazaqstan óńirlik saılaý komıssııasy jetekshisiniń orynbasary Aleksandr Rýkın málim etti.
Onyń aıtýynsha, 2013 jyldyń tamyzy men 2017 jyldyń sáýiri aralyǵynda túrli sebepterge baılanysty 118 ákimniń ókilettikteri toqtatylǵandyqtan, saılaýǵa 249 eldi mekenniń barlyǵy qatysqan joq.
Sonymen birge, jańadan saılanǵan 131 ákimniń 100-i qaıta saılanǵandar.
Jańa aýyl ákiminiń jalpy «portretine» qatysty erekshelikterge toqtalar bolsaq, olar, ádettegideı, bilimi joǵary (tek eki ákimniń ǵana arnaıy orta bilimi bar, qalǵandary joǵary bilimdi), qyzmet baıany jaqsy, orta jastaǵy belsendi adamdar. Aýyldaǵy atqarýshy bılik basshylarynyń mundaı sapalyq quramy úmitkerlerge qoıylatyn jańa, joǵary biliktilik talaptaryna saı kelip tur.
Úmitkerlerdi jergilikti turǵyndarmen keńeskennen keıin aýdan ákimderi balamaly túrde usynady. Sodan soń máslıhat depýtattary janama saılaý arqyly daýys berip, úmitkerlerdi tańdaıdy.
«QazAqparat» HAA tilishisiniń «QR «Saılaý týraly» jańa Zańynyń arqasynda Qazaqstannyń aýyldary men aýyldyq okrýgterinde bilimdi ári bilikti «jańa zaman ákimderi» keledi me» degen suraǵyna, Aleksandr Rýkın osy paıymdaýmen tolyq kelisetindigin jetkizdi.
«Saılaýǵa daıyndyq barysynda saılaý komıssııasyna ákim bolýǵa úmitkerlerden 402 usynyshat kelip tústi, olar uzaq tekseristen ótip baryp qana tirkeldi», - degen Rýkın alǵashqy zvenodaǵy atqarýshy bıliktiń muqııat iriktelýi zańnamalyq turǵyda bekitilgenin rastaı tústi.