ShQO polıtsııasynda 10-nan astam Táýelsizdik qurdasy eńbek etip júr
Azamat Qonyspaev, polıtsııa kapıtany:
- 1991 jyly egemendigimizdi alyp, el eńsesin tikteı bastaǵan kezde dúnıege keldim. Polıtsııa qyzmetkeri bolý – meniń bala kúngi armanym edi. Qazirde azamattarǵa qolymnan kelgenshe kómektesip júrmin. Bul qyzmetti tańdaǵanyma esh ókinbeımin. Bizdiń eń basty mindetimiz – ashyqtyq, jedeldik jáne halyqpen tyǵyz baılanys ornatý.
Azamat Óskemen qalasy polıtsııa basqarmasynyń Ertis polıtsııa bóliminde ýchaskelik ınspektor bolyp jumys isteıdi. Kóptegen qylmystyń aldyn alyp, jemisti eńbek etip keledi.
Ózine senip tapsyrylǵan ákimshilik aýmaqta qoǵamdyq tártiptiń saqtalýyn jiti qadaǵalaýda. Onyń kúndelikti jumys kúni ózine senip tapsyrylǵan ákimshilik aýmaqty sholýdan bastalady.
Esik aldyna qoqys tastaǵandardy, kópshilik oryndarda ishimdik ishkender men temeki shekkenderdi de tártipke keltirýmen aınalysady.
Bul - onyń alty jyldan beri atqaryp kele jatqan qyzmeti.
Áıgerim Baqtııarova, polıtsııa kapıtany:
- Táýelsizdik qurdasy retinde úlken jaýapkershilikti sezinemin. Elbasy Nursultan Nazarbaev óz sózinde «Egemendi elimizdiń jarqyn bolashaǵy – búgingi jastar», – degen edi. Demek, Qazaqstannyń bolashaǵy – bizdiń qolymyzda. Sondyqtan elimizdi, jerimizdi kórkeıtip, óz úlesimizdi qosý – paryzymyz. Búkil qazaq elin Táýelsizdik merekesimen quttyqtaımyn! Qazaqstanymyzdyń kók baıraǵy máńgi jelbiresin!
Áıgerim Óskemen qalasy polıtsııa basqarmasynyń Ertis polıtsııa bóliminde tergeýshi. Shyǵys Qazaqstan oblysy Marqakól aýdany Bobrovka aýylynda dúnıege kelgen.
Quqyq qorǵaý organynda er adamdarmen ıyq tirestirip qyzmet etip júr. Ol ózine júktelgen mindetterge zor jaýapkershilikpen qarap, qyzmetin abyroımen atqaryp keledi.
Aıdyn Myrzaǵalı, polıtsııa aǵa leıtenanty:
- Polıtseı – halyqtyń qorǵany. Bizdiń mindetimiz – Otanǵa adal qyzmet etý. Qylmysty ashýda, qaýipsizdikti saqtaýda polıtsııa qyzmetkerleriniń eńbegi zor. Soǵan oraı, memleket tarapynan quqyq qorǵaý organdary qyzmetkerlerine kóp qoldaý kórsetilip otyr.
Aıdyn - Shyǵys Qazaqstan oblysy Kúrshim aýdanynyń týmasy. Óskemen qalasy polıtsııa basqarmasy patrýldik polıtsııa batalonynyń ınspektory.
Ásem Suraýjanova, polıtsııa aǵa leıtenanty:
- Jaryq dúnıege táýelsiz eldiń alǵashqy azamattarynyń biri bolyp kelý baqyty mańdaıyma jazylypty. Sol úshin ata-anama alǵysym sheksiz. Osy aıtýly kúnde ómirge kelý maǵan maqtanysh sezimimen birge, úlken jaýapkershilik júkteıtinin es bile túsindim. Jas memleketimizdiń táı-táı basyp, aıaǵynan nyq turýy meniń de boıjetip, ómirdiń qyr-syryn tanýyma, azamattyq kózqarasymnyń qalyptasýyna áser etti. Esimdi bilgeli ákem ishki ister organynda qyzmet atqardy. Sodan bolar, qoǵamda bolyp jatqan ár ózgeristerden habardar bolyp otyrdyq. Ásirese onyń shen taqqan formasyna qyzyǵa qaraıtynmyn. Kishkentaıymnan «Óskende ákem sııaqty tártip saqshysy bolamyn!» dep armandaıtynmyn. Sol armanym meni adal ári janashyr bolýǵa, Otanymdy qaltqysyz súıýge úıretti. Bala bolsam da Táýelsizdiktiń ońaılyqpen kelmegenin, ata-babamyzdyń qany men kóz jasynyń, tókken teriniń salmaǵyn sezip óstim. Osy 29 jylda elimizde tynyshtyq ornap, talaı ıgi reformalar júzege asty. Qazaqstan ózge elder moıyndaǵan, bedeldi memleketterdiń birine aınaldy. El bolashaǵy biz sııaqty jastardyń qolynda.
Ásem Óskemen qalasy polıtsııa basqarmasynyń Úlbi polıtsııa bóliminde kámelettik jasqa tolmaǵandar isi boıynsha ýchaskelik ınspektor.
Іshki ister organynda 2015 jyldan bastap qyzmet etip júr.
Aıdyn Nursapanov, polıtsııa aǵa leıtenanty:
- Táýelsizdiktiń qurdasy bolý maǵan úlken jaýapkershilik júkteıdi. Osy oraıda ár qadamdy oılap basyp, jasar isiń men aıtar sózińe muqııat bolý kerek dep oılaımyn. Biz aldymen táýelsizdiktiń ońaılyqpen kelmegendigin, egemendik jolynda talaı ata-babalarymyzdyń qanyn da, janyn da aıamaǵandyǵyn túsinýge tıispiz.
Aıdyn - Óskemen qalasy polıtsııa basqarmasy patrýldik polıtsııa batalonynyń ınspektory. Іshki ister organynda 2014 jyldan beri qyzmet atqarady.