ShQO polıtsııasy áleýmettik jelini dúrliktirgen aqparatqa qatysty málimet berdi

ÓSKEMEN. QazAqparat - Shyǵys Qazaqstan oblysynyń polıtsııa departamenti áleýmettik jelilerde taraǵan adam zorlaý oqıǵasyna qatysty málimet berdi, dep habarlaıdy QazAqparat tilshisi.

Áleýmettik jelilerde «Jazasyz zorlyq, BAQ-tyń qoldaýyn suraımyz» degen taqyryppen aqparat taraǵan bolatyn. Oblystyq polıtsııa departamentiniń baspasóz qyzmeti osy jaıtqa baılanysty resmı málimet taratty.

«Óskemen qalasynyń polıtsııa basqarmasyna qarasty Úlbi bólimshesiniń óndirisinde 34 jastaǵy óskemendik turǵynǵa qatysty qylmystyq is jatyr. 32 jastaǵy Ulan aýdanynda turatyn áıel óskemendik er adamnyń ózin zorlaǵanyn málimdep, aryz jazǵan bolatyn. Onyń kórsetýi boıynsha, oqıǵa 2019 jyldyń 18 qańtarynda bolǵan. Marqum bolǵan kúıeýiniń aǵasy áıelmen birge ishimdik iship, keıin kúshpen jynystyq qatynasqa túsken. Sot saraptamalyq taldaý áıeldiń denesine jeńil jaraqattar túskenin anyqtady», - delingen resmı aqparatta.

Departamenttiń málimetine súıensek, qylmystyq istiń barysy baqylaýǵa alynǵan.

«Tergeý jumystary boıynsha tıisti tapsyrmalar berildi. Sotqa deıingi tekserý jalǵasady», - delingen aqparatta.