ShQO polıtseıleri kólikten 19 keli esirtki tapty
ShQO Polıtsııa departamenti baspasóz qyzmetiniń málimetine súıensek, polıtsııa qyzmetkerleri «Dármek» jedel aldyn alý sharasy aıasynda 5518 áskerı bóliminiń arnaıy jasaǵymen birlesip, Jarma aýdany Qalbataý aýylynyń mańyndaǵy «Almaty-Óskemen» tasjolynda «Volvo-580» markaly avtokólikti toqtatqan. Kólikte júrgizýshi men Jambyl oblysynyń 39 jastaǵy turǵyny boldy.
«Tekserý barysynda avtokólik júksalǵyshynan eki dóńgelek tabyldy. Onyń ishinen skotchpen oralǵan «keptirilgen marıhýana» salynǵan 19 túıinshek shyqty», - dedi ShQO PD bastyǵynyń orynbasary Talǵat Shaıahmetov.
Tergeý barysynda kúdiktiniń tanysyna mán-jaıdy aıtpaı, oǵan avtokóligimen Óskemen qalasyna deıin dóńgelekterdi jetkizip berýin ótingeni anyqtaldy. Belgili bolǵandaı, er adam Jambyl oblysynan esirtki jetkizý arnasyn uıymdastyrýǵa tyrysqan.
Saraptama qorytyndysyna sáıkes, tárkilengen esirtkiniń jalpy salmaǵy 19,5 kelini qurady. Qazirgi ýaqytta kúdikti qamaýǵa alynǵan. QR QK-niń 297-baby 3-bóligi boıynsha sotqa deıingi tergeý amaldary júrgizilýde.