ShQO órt sóndirýshileri jylytý maýsymy bastalǵaly 160 myń úıdi aralap shyqty

ÓSKEMEN. QazAqparat – Shyǵys Qazaqstan oblysynyń qutqarýshylary jylytý maýsymy bastalǵaly 160 myń úıdi aralap shyqty, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, jylytý maýsymy bastalǵaly beri jer úılerde órt qaýipsizdigi erejeleriniń saqtalýyna baqylaý kúsheıtilgen.

«Osy ýaqytqa deıin qutqarýshylar barlyǵy 160 myń úıdi aralap shyqty. Nátıjesinde 40 012 úıde órt qaýipsizdigi talaptarynyń buzylǵandyǵy anyqtaldy. Ol úılerde barlyǵy 42 820 buzýshylyq tirkelgen. Profılaktıkalyq sharalar turǵyndar sanyn kóptep qamtýǵa jáne olarǵa qaýipsizdik erejelerin úıretýge múmkindik beredi», - delingen aqparatta.

Buzýshylyqtar kóbinese jylytý júıelerin, elektr jelileri men elektr jabdyqtaryn durys paıdalanbaýǵa baılanysty bolyp otyr. Árbir úshinshi úıde qaýipsizdik erejeleri saqtalmaǵan.

Reıdterden bólek, qutqarýshylar jylytý maýsymy bastalǵanǵa deıin áleýmettik osal otbasylardyń úılerde ýly gazdy anyqtaıtyn 2476 datchıkti ornatty.