ShQO ormandarynda bıyl 74 ret órt shyqty
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha órt qaýpi joǵary kezeń bastalǵaly beri 74 orman órti tirkeldi. Qyzyl jalynnyń jalpy aýdany 814,1 gektardy quraǵan.
Órtterdiń 60% naızaǵaıdan, 36% halyqtyń otty abaısyz qoldanýynan shyqqan. Qazirgi ýaqytta Shyǵys Qazaqstan oblysynyń qutqarýshylary kúsheıtilgen rejımde jumys istep jatyr.
«Ot tutanýyn bastapqy satyda qadaǵalaý úshin TJD qyzmetkerleri kosmomonıtorıng paıdalanýda. Ondaǵy derekterdi «Qazaqstan Ǵarysh Sapary» UK» AQ men «Geosat» JShS usynady. Bıyl sonyń arqasynda 482 termonúkte anyqtalyp, qutqarýshylar órttiń odan ári taralýyna jol bermedi. Mamandandyrylǵan zamanaýı baǵdarlamalyq jasaqtamanyń kómegimen táýlik boıy úzdiksiz baqylaý júrgiziledi», - delingen aqparatta.