ShQO oqýshylary Abaı shyǵarmashylyǵyna arnalǵan kvestke qatysty

ÓSKEMEN. QazAqparat – Shyǵys Qazaqstan oblysynda Abaı kúnine oraı jalpy orta bilim beretin mektepterdiń 9-synyp oqýshylary «Abaı shyǵarmashylyǵynyń qyry men syry» atty onlaın sabaqqa qatysty, dep habarlaıdy QazAqparat tilshisi.

ShQO Aqparat ortalyǵynyń málimetinshe, shara barysynda qazaqtyń bas aqyny Abaıdyń ǵylym men mádenıetke qosqan úlesi ashyp kórsetildi. Budan bólek, onlaın sabaqqa qatysýshylarǵa hakimniń ómiri men shyǵarmashylyǵy jan-jaqty tanystyryldy.

«Dáristen soń balalar uly aqynnyń shyǵarmashylyǵyna baılanysty suraqtardan quralǵan kvestke qatysyp, bilimderin shyńdady. Oqýshylar kvesttegi saýaldarǵa úsh tilde jaýap berdi. Sondaı-aq olar Abaıdyń ómiri men shyǵarmashylyǵyna arnalǵan jańa kitappen tanysty. Shara sońynda mektep oqýshylary uıymdastyrýshylarǵa alǵystaryn bildirip, bolashaqta osy onlaın dáristen alǵan bilimderin kádege jaratyndaryn jetkizdi», - delingen málimette.