ShQO-nyń jylý elektr ortalyqtarynyń daıyndyǵy 32%-dy quraıdy – Almasadam Sátqalıev

ASTANA. QazAqparat - 2023 jylǵy 14 shildede QR Energetıka mınıstri Almasadam Sátqalıev Shyǵys Qazaqstan oblysynyń turǵyndarymen kezdesti, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

Jıynda sóılegen sózinde mınıstr oblystyń ishki elektr energııasyn tutyný kólemi 3,9 mlrd kVtsaǵ kezinde óńirde elektr energııasyn óndirý kólemi 3,4 mlrd kVtsaǵ quraǵanyn habarlady.

Óńirdiń elektr jelileriniń jalpy uzyndyǵy 21 myń km-dan asady.

Belgilengen tarıfter halyq úshin – 13,948 tg/kVtsaǵ, zańdy tulǵalar úshin – 23,554 tg/kVtsaǵ, bıýdjettik uıymdar úshin – 42,158 tg/kVtsaǵ.

Almasadam Sátqalıev baıandamasynda búgingi tańda óńirdiń JEO daıyndyǵy 32%-dy quraıtynyn atap ótti.

GES-te jóndeý jumystary 64%-ǵa oryndaldy. 165 km elektr jelilerin nemese jospardyń 30% kúrdeli jóndeý aıaqtaldy.

Jylý jelilerin tehnıkalyq tekserý Óskemen, Rıdder jáne Shemonaıha qalalary boıynsha aıaqtaldy.

Energetıkalyq vedomstvo basshysy Rıdder JEO-da jóndeý naýqanynyń barysy týraly jeke toqtaldy.

Qarjy mınıstrligimen jáne oblystyq ákimdikpen birlesip Úkimet rezervinen qarajat bólý tetigi pysyqtaldy. Jóndeý boıynsha jobalaý-smetalyq qujattarǵa memlekettik saraptamalar alyndy. Jóndeý jumystarynyń jalpy somasy 8,3 mlrd. teńgeni quraıdy.

Bul rette, Rıdder JEO jóndeý jumystaryna 8 merdiger uıym tartyldy.

Rıdder JEO-da jóndeý jumystaryn jylytý maýsymy bastalǵanǵa deıin keste boıynsha aıaqtaý josparlanýda.