ShQO-nyń taýly aımaǵyndaǵy órtti sóndirýge birneshe tikushaq tartyldy

ÓSKEMEN. QazAqparat – Shyǵys Qazaqstan oblysy Cherno-Ýbınsk ormanshylyǵyndaǵy órt búgin 7 ga alańda oqshaýlandy. Qoıý tútin órtti sóndirýde qıyndyq týǵyzǵan, dep habarlaıdy QazAqparat Tótenshe jaǵdaılar mınıstrligine silteme jasap.

Taýly jer bolýyna baılanysty órt sóndirýshiler, ormanshylar jáne «Qazavıaqorǵaý» desanty ShQO ákimdigi avıabólimderiniń Mı-8 tikushaǵymen janý oshaǵyna jetkizildi.

Ottyń taralýyn joǵarydan «Qazavıaqutqarý» tikushaǵynyń ushqyshtary baqylap otyrdy jáne desantshylarǵa janý jıeginiń dál koordınattaryn berdi. Bul tútinge qaramastan órtti qorshaýǵa jáne onyń úlken aýmaqqa taralýyna jol bermeýge kómektesti.

Órtti sóndirýge ShQO orman sharýashylyǵy men TJD-dan 72 qyzmetker, 4 tehnıka, ShQO avıabólimshesiniń MI-8 ben MI-2 jáne «Qazavıaqorǵaý» tikushaqtary jumyldyryldy.