ShQO mektepteriniń 2 myń muǵalimi ınklıýzıvti bilim berý kýrsynan ótti

ÓSKEMEN. QazAqparat – Shyǵys Qazaqstan oblysynda 2 myń ustaz ınklıýzıvti bilim berý boıynsha kýrstan ótti. Bul jaıly aımaq basshysy Danıal Ahmetov ShQO ákimdiginde oqytýshylardy qaıta daıarlaý máselesine qatysty ótken jıyn barysynda aıtty, dep habarlaıdy QazAqparat tilshisi.

«Oblys boıynsha 2000 muǵalim ınklıýzıvti bilim berýge qatysty kýrstan ótti. Mektepterde osy baǵytta arnaıy synyptar ashýdy josparlap otyrmyz. Sonymen qatar IT salasyndaǵy pedagogterdiń biliktiligin arttyrý boıynsha pılottyq joba iske asyrylýda», - dedi ol.

Oblys ákiminiń aıtýynsha, búgingi tańda orys mektepterinde qazaq tilin, qazaq mektepterinde orys jáne aǵylshyn tilderin oqytý baǵdarlamalary jetildirildi.

«Ókinishke qaraı, Bilim basqarmasy júrgizgen taldaý kórsetkendeı, bilim ordalarynda qazaq tilin oqytý deńgeıi tómen. Birinshi kezektegi mindet – balalardy memlekettik tilde sóıleýge, ony kúndelikti ómirde paıdalanýǵa úıretý. Sondyqtan muǵalimderdi qazaq tilin oqytýdyń zamanaýı jáne pármendi ádistemelerimen tanystyratyn tıimdi bir jarym aılyq kýrstar ázirleý qajet», - dedi Danıal Ahmetov.