ShQO-lyq sharýager týǵan aýylyn damytyp, muqtaj jandarǵa úı salýda

ÓSKEMEN. QazAqparat – Shyǵys Qazaqstan oblysy Shemonaıha aýdanynynda turatyn sharýager Vladımır Akýlovtyń kindik qany tamǵan Kamyshınka aýylynan kóshkisi joq. Jergilikti jurtty jumyspen qamtyp otyrǵan ol jyl saıyn óz esebinen 5-6 úı salady.

Kamyshınka aýyly Óskemen qalasynan 150 shaqyrymdaı jerde ornalasqan. Sol aýyldyń týmasy Vladımır Akýlov 20 jyldan astam ýaqyt buryn «Kamyshınskoe» sharýa qojalyǵyn qurǵan.

«Bizde 550 adam mal sharýashylyǵymen jáne eginshilikpen aınalysady. Turǵyndardy jumyspen qamtamasyz etýge tyrysamyz. Jyl saıyn óz esebimizden 5-6 úı salamyz. Meıli muǵalim, mehanızator nemese áleýmettik qyzmet kórsetý salasynyń mamany bolyńyz, eń bastysy adal jumys isteseńiz sizge baspana berýge tyrysamyz. Ózderin jaıly sezinip, esh kedergisiz jumys istese boldy, - dedi V.Akýlov.

Óz sózinde ol jylyna eki myńǵa jýyq shyrsha otyrǵyzatyndyqtaryn aıtty. Bıyl shyrshadan basqa elordadan ákelingen segiz júz terek otyrǵyzylǵan.

«Aýyldardy damytyp, saıabaqtardy abattandyryp jatyrmyz. Prýgerovo eldi mekenine balalar oıyn alańy salyndy. Endi Kamyshınkada da boı kóteredi. Mektep úzilisteri kezinde búldirshinder osynda oınaıtyn bolady. Balalardyń úıde ınternette otyrmaı, taza aýada júrgenderi durys qoı», - deıdi ol.

Sharýager jyl saıyn ár túrli áleýmettik jobalarǵa 50 mıllıon teńge ınvestıtsııa quıyp, aýyl turǵyndaryna paıyzsyz nesıe beredi.