ShQO qutqarýshylary tyl eńbekkeriniń úıinde senbilik ótkizdi

ÓSKEMEN. QazAqparat – Shyǵys Qazaqstan oblysy Tótenshe jaǵdaılar departamentiniń qyzmetkerleri men №29 mekteptiń qosymsha bilim berý ortalyǵynyń jas qutqarýshylary tyl eńbekkeri Zoıa Larıonovany Jeńis kúnimen quttyqtap, aýlasynda senbilik uıymdastyrdy, dep habarlaıdy QazAqparat tilshisi.

Zoıa Aleksandrovna úıine kelgen kómekshilerge atqarylatyn jumys kólemin belgilep berdi. Olar aýlany jınastyryp, qoqystan, aramshópten tazartty. Qýraǵan aǵashtar men butalardy kesip, baqshadaǵy jerdi qopsytty.

«Úı ishin de jınap, kómirqyshqyl gaz mólsherin anyqtaıtyn arnaıy datchık ornatty. Senbilikten keıin qutqarýshylar tyl eńbekkerine sol bir jyldardy eske túsirtý úshin dalada pisirilgen sarbaz botqasynan dám tatqyzdy», - dep habarlady oblystyq TJD baspasóz qyzmeti.

Zoıa Larıonova surapyl soǵys jyldaryn eske túsirgende kózine ylǵı jas alady. Olar Óskemen qalasynyń irgesindegi aýylda turǵan. Soǵys bastalǵan sátten-aq balalyq shaǵy aıaqtaldy. Ákesi maıdanǵa attanyp, anasymen jáne eki ápkesimen birge kolhozda jumys isteı bastady. Ol kezde nebári 9 jasta edi.

«Qolymyzdan kelgenshe eńbek ettik. Joqshylyqta, ashtyqta ómir súrdik. Anam aýyryp gospıtalda jatqanda, úıde 4 qyz jetimsirep qaldyq. Soǵys bitken kezde kolhoz meni Óskemendegi ýchılışege traktorshy kýrsyna jiberdi. Jigittermen qatar traktorshy kýáligin aldym. Hatshy da jáne kassır de bolyp jumys istedim. Sońǵy jumys ornym – órt sóndirý bólimi boldy. Munda 29 jyl eńbek ettim», - deıdi tyl eńbekkeri.

Ózin arnaıy quttyqtap, úı-aýlasyn tazalap ketken qutqarýshylarǵa shynaıy rızashylyǵyn jetkizdi.

Buǵan deıin ShQO ákimi soǵys ardagerin arnaıy baryp quttyqtaǵan edi.